समाचारहरू

धैनकोट गाविसमा रहेको स्वास्थ्य चौकी दुई महिनादेखि स्वास्थ्यकर्मीविहीन बनेको स्थानीयले आरोप लगाएका छन् ।

धैनकोट गाविसको स्वास्थ्य चौकीमा कार्यरत अहेब सन्तोष मल्ल र सुरेन्द्र शाह मङ्सिर महिनामा सरुवा भएर अन्यत्र गएपछि रिक्त रहेको दरबन्दीमा जिल्ला स्वास्थ्य कार्यालयले अन्य स्वास्थ्यकर्मीलाई पठाउन नसक्दा स्वास्थ्य चौकी स्वास्थ्यकर्मीविहीन बनेको हो ।

स्वास्थ्य चौकीका दुवै अहेब सरुवा भई अन्यत्र गएपछि जिल्ला स्वास्थ्य कार्यालयले छिमेकी गाविस नार्थपुका हिरा नेपालीलाई करार नियुक्ति गरेको थियो । हिरा लोकसेवाको लिखित परीक्षा पास भई मौखिक परीक्षामा सहभागी हुनका लागि जुम्ला गएपछि अहिले कार्यालय सहयोगी जय जैसी र फेज नेपाल नामक गैरसरकारी संस्थाका कर्मचारीको भरमा स्वास्थ्य चौकी खुल्ने गरेको छ ।

धैनाकोट गाविस-७ का धनराज शाहीले दिएको जानकारी अनुसार मङ्सिर महिनादेखि स्वास्थ्यकर्मी नहुँदा गाविसका बालबालिकाको नियमित खोप, गर्भवती महिलाको खोपका साथै अन्य सेवा नपाएको स्थानीयको गुनासो छ ।

स्वास्थ्य संस्थामा कार्यरत अहेब मल्लको श्रेत्रीय स्वास्थ्य निर्देशनलाय सुर्खेत र शाहको स्वास्थ्य मन्त्रालयबाट सरुवा भएको थियो । रिक्त स्थानमा एक जनालाई करार नियुक्त गरेको भएपनि उनीसमेत अन्यत्र गएकाले समस्या उत्पन्न भएको जिल्ला स्वास्थ्य कार्यालयका प्रमुख डा. सरोज अधिकारीले बताए ।

जीवन सेजुवाल