दुई महिनादेखि ढुवानी नहुँदा बारेकोटमा खाद्यान्न सङ्कट

 

बारेकोट गाउँपालिकामा दुई महिनादेखि खाद्यान्न सङ्कट देखिएको छ । असिनापानीले हिउँदेबाली नष्ट गरिदिएको, खाद्य डिपोमा चामल नभएको र बाटो बिग्रिएकाले खाद्यान्न ढुवानी हुन नसकेपछि खाद्यान्न सङ्कट भएको हो ।

गाउँपालिकामा किनेर खाने अन्न समेत पाउन छाडेपछि स्थानीयबासी चरम खाद्यान्न सङ्कटको चपेटमा परेका छन् । सक्ला, नायकवाडा, रामीडाँडा र रोकायगाउँका बासिन्दा खाद्य अभावको चपेटामा परेका छन् । बाढीपहिरोले बारेकोट जाने बाटो अबरूद्घ गरिदिएपछि व्यापारीले दुई महिनादेखि खाद्यान्न ढुवानी गर्न पाएका छैनन् ।

गाउँमा भएको अन्न सकिएको र थप खाद्यान्न ढुवानी नभएपछि स्थानीय भोकै पर्ने अवस्था आएको बारेकोट गाउँपालिका-५ का वीरबहादुर बस्नेतले बताए । उनले भने-'असिनापानीले हिउँदेबाली उत्पादन भएन । बाटो अबरूद्घ नहुँदासम्म निजी क्षेत्रका व्यापारीले पनि विक्रीका लागि खाद्यान्न लैजान्थे । खाद्य संस्थानको खाद्य डिपोमा पनि खाद्यान्न थियो तर अहिले न किनेर खाने अन्न पाइन्छ । न घरमा अन्न छ । नयाँबाली पाकेको छैन । साह्रै समस्या भयो ।'

चामल नभएपछि खाद्य डिपो बन्द छ । डिपो इञ्चार्ज रूद्रबहादुर देवकोटा पनि चामल नभएपछि डिपो बन्द गरेर दुई हप्तादेखि घरतिर हिँडेका छन् । संस्थानले बारेकोटस्थित नायकवाडा खाद्य डिपोमा चालु आर्थिक वर्षमा २ हजार क्वीन्टल चामल ढुवानीका लागि टेण्डर आह्वान गरेको छ । तर, टेण्डर स्वीकृतीका लागि प्रक्रिया पुर्‍याउन समय लाग्ने भन्दै जिल्ला खाद्य व्यवस्थापन समितिको बैठकले तत्काल १ हजार २ सय क्वीन्टल चामल बिना टेण्डर ढुवानी गरी खाद्य सङ्कट टार्न सरकारलाई आग्रह गर्ने निर्णय गरेको छ ।

प्रमुख जिल्ला अधिकारी ललितकुमार बस्नेतको अध्यक्षतामा बसेको बैठकले बारेकोटमा भएको खाद्यान्न अभाव टार्न तत्काल चामल ढुवानी गर्न खाद्य संस्थानको केन्द्रिय कार्यालय काठमाडौँ, आपूर्ति विभाग र मन्त्रालयलाई आग्रह गर्ने निर्णय गरेर पठाए पनि सुनुवाइ नभएको गाउँपालिका अध्यक्ष महेन्द्रबहादुर शाहले बताए ।

हिउँदमा परेको असिनापानीले किसानको बिउ समेत नरहने गरी अन्नबाली नभएपछि खाद्यान्न सङ्कट परेको उनको भनाइ छ । गरिबीका कारण अधिकांशले किनेर खान सक्ने अवस्था पनि छैन । सहुलियत दरको चामल ढुवानीमा पनि ढिलासुस्ती हुँदा स्थानीय निकै मर्कामा परेका छन् ।

केही व्यापारीसँग मौज्दात रहेको चामलको मूल्य पनि दोब्बर बढेको छ । ४० रुपियाँमा पाइने मोटो चामल ८० रुपियाँ पुगेको स्थानीय शिक्षक गोरबहादुर सिंहले बताए । उनका अनुसार केही दिन अघिसम्म महङ्गोमा किन्न पाइने त्यही चामल पनि पाउन छाडेको छ । 'बारेकोटमा तत्काल खाद्यान्न पुर्‍याइएन भने चरम सङ्कट पर्छ । गाउँले भोकभोकै मर्ने अवस्था आउँछ ।'-उनले भने-'सडक, यातायात नपुगेको सो गाउँपालिकामा घोडा खच्चड समेत हिँड्न नमिल्ने गरी बाटो अबरूद्घ भएपछि समस्या परेको हो ।'


दिनेशकुमार श्रेष्ठ