समाचारहरू

दुई महिनादेखि पाल्पा जिल्ला अस्पतालमा रेबिज विरूद्धको एआरटि भ्याक्सिन नहुँदा सेवाग्राहीहरू मर्कामा परेका छन् । जिल्ला अस्पतालमा सो भ्याक्सिन नहुँदा सेवाग्राहीहरू महङ्गो मुल्यमा किनेर लगाउन बाध्य भएका छन् ।

पाल्पा अस्पतालमा दैनिकजसो २ देखि ५ जनासम्म रेबिजका बिरामीहरू आउने गर्छन् । तानसेन नगरपालिका-५ अर्चलेका बुद्धबहादुर बिष्टले आफूलाई दुई दिनअघि छिमेकीको कुकुरले टोकेर रेबिज विरूद्धको भ्याक्सिन लगाउन गएपनि अस्पतालमा भ्याक्सिन नहुँदा मर्कामा परेको बताए । उनले बाहिर भ्याक्सिन किन्न आफ्नो आर्थिक अवस्था कमजोर रहेकोले पनि अब भ्याक्सिन लगाउने कि नलगाउने भन्ने अलमलमा परेको बताए ।

कुकुरले टोकेको ब्यक्तिलाई कम्तीमा १ महिनाभित्र ५ पटक सो भ्याक्सिन लगाउनुपर्छ । क्लिनकमा प्रति भ्याक्सिन मुल्य ५ सय ८० रुपियाँ तिर्नुपर्छ ।

जिल्ला स्वास्थ्य कार्यालय पाल्पाका सूचना अधिकारी माधवप्रसाद ज्ञवालीले क्षेत्रीय मेडिकल स्टोर बुटवलमा भ्याक्सिन माग गरिएपनि उपलब्ध हुन नसकेकाले समस्या भएको बताए ।

यज्ञमूर्ति तिमिल्सिना