समाचारहरू

सरकार र डक्टर गोविन्द केसी पक्षले आआना अडान यथावत राखेपछि साउन १ गतेको वार्ता पनि असफल भएको छ भने १८ दिनदेखि अनशनरत केसीको स्वास्थ्य अवस्था कमजोर बनिरहेको स्वास्थ्यकर्मीले बताएका छन् ।

माग सुनुवाइमा सरकार संवेदनशील नबनेको डक्टर केसीको समर्थक संयुक्त सङ्घर्ष समिति जुम्लाले जनाएको छ । केसीको स्वास्थ्यस्थिति गम्भीर बन्दै आएपछि जीवनरक्षाको माग गर्दै जतिसक्दो छिटो केसीका माग सम्बोधन गर्न समितिले सरकारलाई चेतावनी दिएको छ ।

कर्णाली स्वास्थ्य विज्ञान प्रतिष्ठानमा अनशनरत डक्टर केसीलाई सरकारले सत्याग्राहीको रूपमा नभई बिरामीको रूपमा हेरेकाले वार्ता निष्कर्षविहीन भएको भन्दै उनका समर्थक थप आक्रोशित भएका छन् ।

केसीका माग तत्काल सम्बोधन नभए आन्दोलनका स्वरूप परिवर्तन गर्ने र त्यसबाट निम्तिने जोखिमको जिम्मेवार सरकार हुनुपर्ने संयुक्त सङ्घर्ष समितिले चेतावनी दिएको छ ।

चिकित्सा शिक्षा सुधारसम्बन्धी माग राखेर सत्याग्रह सुरू गरेका डक्टर केसीको मागप्रति सरकार संवेदनशील नभएको नागरिक समाज जुम्लाका अध्यक्ष राजबहादुर महतको आरोप छ । ‘न्यायका लागि लडिरहेको एक नागरिक मृत्युको मुखमा पुगिसक्दा समेत सरकार मौन हुनु यो दुखद् कुरा हो ।’–उनले भने ।

केसी आफ्नो माग सम्बोधन नभएसम्म अनशन नतोड्ने अडानमा छन् भने सरकार राष्ट्रिय चिकित्सा विधेयकका प्रावधानबाट पछाडि नहट्ने अडानका कारण दुवैपक्ष बीच वार्ता पनि लम्बिएको छ ।

केसीलाई आइसियुमा राखेर उपचार गर्नुपर्ने अवस्था आइसकेपनि प्रतिष्ठानमा आइसियु नहुँदा उनको ज्यान जोखिमयुक्त सङ्क्रमणबाट बचाउन चुनौती थपिएको उपचारमा संलग्न चिकित्सकहरूले बताएका छन् ।

केसीको जीवनरक्षाका सरकारले व्यवस्थापन गर्ने एयरलिफ्ट उनी र उनका समर्थकले अस्वीकार गर्दै आएका छन् ।

ओपिडि सेवा ठप्प

अनशनरत डक्टर गोविन्द केसीको मागप्रति ऐक्यबद्धता जनाउँदै कर्णाली स्वास्थ्य विज्ञान प्रतिष्ठान शिक्षण अस्पतालमा साउन १ गतेबाट ओपिडी सेवा ठप्प पारिएको छ ।

केसीको जीवनरक्षा गरी उनका माग सम्बोधनका लागि सरकारलाई दबाब दिन आकस्मिक बाहेकका सेवा अनिश्चितकालका लागि ठप्प पारिएको प्रतिष्ठानका निर्देशक डक्टर धर्मराज गोसाईले बताए ।

केसीका मागप्रति सरकारले बेवास्ता गरेको भन्दै माग सम्बोधन नभएसम्म सेवा सुचारू नगर्ने प्रतिष्ठानले चेतावनी दिएको छ । वार्ता टोलीसँग केसीका माग सम्बोधन गरी चाँडो अनशन तोडाउन समेत प्रतिष्ठानले आग्रह गरेको छ । ओपिडी सेवा अवरूद्ध हुँदा सामान्य बिरामीहरू मर्कामा परेका छन् ।

मानदत्त रावल