दुई तिहाइ नपुग्दा संविधान संशोधन विधेयक अस्वीकृत

  ०७४ भदौ ५ गते

व्यवस्थापिका-संसदबाट नेपालको संविधान (दोस्रो संशोधन) विधेयक २०७३ दुई तिहाइ मत नपुग्दा अस्वीकृत भएको राससले जनाएको छ ।

भदौ ५ गते बसेको संसद्को बैठकमा संविधान संशोधन प्रस्तावमाथि मत विभाजन गरिँदा संशोधनको पक्षमा आवश्यक दुई तिहाइ मत पुग्न नसकेपछि विधेयक अस्वीकृत भएको हो ।

संशोधन विधेयक पारित हुन संसद्मा तत्काल कायम सदस्य सङ्ख्या ५ सय ९२ को दुई तिहाइ अर्थात ३ सय ९५ मत हुनुपर्नेमा पक्षमा ३ सय ४७ र विपक्षमा २ सय ६ मत परेको थियो । मतदानमा ५ सय ५३ सांसदले भाग लिएका थिए । विधेयक पारित हुन ४८ मत पुग्न सकेन ।

राष्ट्रिय जनता पार्टी नेपालको माग सम्बोधन गर्न सरकारले सो संशोधन प्रस्ताव पेश गरेको बताउँदै आएको थियो ।

संशोधनको पक्षमा सत्तारूढ नेपाली काङ्ग्रेस, नेकपा (माओवादी केन्द्र), राष्ट्रिय जनता पार्टी नेपाल, नेपाल लोकतान्त्रिक फोरमलगायतले मत दिएका थिए भने नेकपा (एमाले), राष्ट्रिय प्रजातन्त्र पार्टी, नेपाल मजदुर किसान पार्टी, राष्ट्रिय जनमोर्चा लगायतले विपक्षमा मत दिएका थिए । राष्ट्रिय प्रजातन्त्र पार्टी (प्रजातान्त्रिक) र नेकपा (माले)ले मतदानमा भाग लिएनन् ।

राजपाले प्रदेश नं २ को स्थानीय तहको निर्वाचन पूर्व संविधान संशोधन हुनुपर्ने माग गर्दै आएको सन्दर्भमा सो प्रस्तावमा आज मतदान भएको हो ।

कानून, न्याय तथा संसदीय मामिलामन्त्री यज्ञबहादुर थापाले संशोधन पारित गरियोस् भनी प्रस्ताव प्रस्तुत गरेका थिए ।

संविधानमा भाषा, नागरिकता, राष्ट्रिय सभामा प्रतिनिधित्व र प्रदेशको सीमाङ्कनलगायतका विषयमा संशोधन प्रस्ताव पेश भएको थियो । विधेयकको दफाबार छलफलमा ५३ जना सांसदले भाग लिएका थिए । उक्त प्रस्ताव गत साउन ३२ गते सदनमा पेश गरिएको थियो । विधेयकमाथि ५० वटा संशोधन पेश भएका थिए ।


अनलाइन डेस्क