समाचारहरू

वैशाख ३० गते हुने स्थानीय तहको निर्वाचनका लागि नेकपा माओवादी केन्द्रबाट त्रिवेणी गाउँपालिका १ का वडाध्यक्षका उम्मेदवार लक्ष्मण ओली र सोही पार्टीका बागी उम्मेदवार सुन्दर ओली पक्षका कार्यकर्ता बीच ०७९ वैशाख १९ गते राति भएको झडपमा दुबै तर्फका ६ जना घाइते भएका छन् ।

घाइते हुनेमा धर्मेन्द्र सुनार, जीवन पुन, टिकाजङ्ग मल्ल, बलबहादुर पुन, चेतन केसी र यमबहादुर पुन रहेका छन् । घाइते धर्मेन्द्र, जीवन र टिकाजङगको अवस्था गम्भीर रहेको प्रहरीले जनाएको छ । घाइतेमध्ये तीन जनालाई थप उपचारका लागि कोहलपुर मेडिकल कलेज नेपालगञ्ज पठाइएको जिल्ला प्रहरी कार्यालय रुकुम पश्चिमका प्रमुख डिएसपी विष्णुप्रसाद सोतीले जानकारी दिनुभयो । घटनाबारे लिखित रुपमा उजुरी आइनसकेपनि मौखिक जानकारीका आधारमा अनुसन्धान थालिएको उहाँले बताउनुभयो । दुईपक्षबीच झडप भएकाले घाइते कुन पक्षका हुन समेत छुट्याउन नसकिएको उहाँको भनाई छ ।

अन्य घाइतेको उपचार जिल्ला अस्पतालमा भएको र हाल डिस्चार्ज भएका छन् ।

सुन्दर ओलीले माओवादी केन्द्रबाट वडाध्यक्षको टिकट नपाएपछि स्वतन्त्र उम्मेदवारी दिई आफ्नो गतिविधि सञ्चालन गर्दा आधिकारिक उम्मेदवार लक्ष्मण ओलीका समर्थकले अवरोध गर्दा झडप भएको स्थानीय टीका देवकोटाले आरोप लगाउनु भयो । सुन्दरले भने झडपमा आफ्नो समूहको कुनै संलग्नता नभएको र व्यक्तिगत रुपमा हुने यस्ता घटनामा आफूलाई नजोड्न भन्दै विज्ञप्ती सार्वजनिक गर्नुभएको छ ।

मनिषा केसी