समाचारहरू

व्याँस गाउँपालिका–४ डोकटमा मृत फेला परेका ३५वर्षीय नरसिंह विष्टको शव एक साता बितिसक्दा समेत आफन्तले बुझेका छैनन् ।

शवको पोष्टमार्टम मङ्सिर ९ गते जिल्ला अस्पतालमा गरिएको भएपनि घटनामा संलग्न व्यक्तिहरुलाई गिरफ्तार गरी कानुनी दायरामा नल्याएसम्म शव नबुझ्ने आफन्तहरुले अडान राखेका छन् ।

मङ्सिर ४ हुने प्रदेश तथा प्रतिनिधिसभा निर्वाचनमा भोट हाल्न सदरमुकाम खलंगाबाट गाउँ गएका विष्टको मङ्सिर ३ गते राति हत्या गरी गाडीएको अवस्थामा सुनसेराको डोम खोला किनारमा शव फेला परेको थियो ।

मृतक विष्टका आफन्त मोहनसिह विष्टका अनुसार स्थानीय बजारबाट २ सय मिटर पररहेको खोलामा गाडेको अवस्थामा शव भेटिएको छ । बाटोभरि घिर्सादै लगेको देखिन्छ ।

‘धारिलो हतियार प्रहार गरि खोलामा शव गाडिएको प्रष्टै देखिएको छ’ उहाँले भन्नु भयो, ‘घट्नाका दोषी पत्ता नलागेसम्म हामी शव बुझ्दैनौ ।’ हामीले किटानी गर्दा पनि प्रहरीले आरोपितहरु गिरफ्तार गरेको छैन् ।’

स्थानीय भुपेन्द्र विष्टले शवको पोष्टमार्टम भएको भएपनि घटनाका संलग्न व्यक्तिहरुलाई गिरफ्तार गरी कानुनी प्रक्रिया अगाडी नबढेसम्म शव नबुझ्ने बताउनु भयो ।

घटनामा संलग्न व्यक्तिहरुको नाममा किटानी जाहेरी समेत दिइसकेको अवस्थामा प्रहरीले घटनामा संलग्न व्यक्तिहरुलाई गिरफ्तार नगरेको स्थानीयहरुको आरोप छ ।

पीडित पक्षले किटानी जाहेरी नदिएको तर ठाडो उजुरीका आधारमा घटनाको अनुसन्धान भइरहेको र केही व्यक्तिहरुलाई सोधपुछका लागि जिल्ला प्रहरी कार्यालयमा ल्याएको जिल्ला प्रहरी कार्यालयका इन्स्पेक्टर राजेश शाहीले बताउनु भयो ।

नरेन्द्रसिह कार्की