समाचारहरू

६ महिना देखि दाम्लोमा बाँधिएकी त्रियुगा नपा-५ भातिखर्ककी २२ वर्षीया गर्भवती महिला सृजना कार्की (खड्का)को निःशुल्क उपचार हुने भएको छ । हेटौंडास्थित मानव सेवा आश्रमले उनको निशुल्क उपचार गर्न लागेको हो ।

सृजनाको विषयमा इन्सेक अनलाइनलगायत विभिन्न सञ्चारमाध्यममा समाचार प्रकाशन तथा प्रशारण गरेपछि आश्रमले जिल्ला प्रशासन कार्यालय उदयपुरसमक्ष उपचार गर्ने इच्छा व्यक्त गरेको हो ।

आश्रमको चासोसँगै गर्भवती महिलालाई थप उपचारको लागि साउन २७ गते पत्रकार तुलसीप्रसाद कोइराला, ओरेक नेपालका कार्यक्रम अधिकृत सुमित्रा कोइराला, असई उमा गुरुङ, प्रहरी जवान शोभा कार्की र सृजनाकी सासू धनमाया खड्कासहितको टोलीले हेटौंडा पुर्‍याएको प्रमुख जिल्ला अधिकारी कृष्णचन्द्र घिमिरेले बताए ।

हेटौंडाको आश्रमले मानसिक स्वास्थ्यको उपचार तथा गर्भवती अवस्थादेखि सुत्केरी भएसम्मको सम्पूर्ण स्याहारसुसार गर्ने भएकाले त्यहाँ पठाएको घिमिरेले बताए । आश्रममा असाहय असक्त र मानसिक रोग लागेकाहरूलाई निशुल्क उपचार गरिने भएकाले उनको उपचार गरेर  सेवा गर्न लगाको आश्रमका प्रमुख रामजी अधिकारीले बताए ।

आश्रमले उपचार गर्ने जनाएपछि वुहारी पुर्‍याउन गएकी सासूले खुशी व्यक्त गरिन् । मानसिक सन्तुलन गुमाएकी सृजनालाई परिवारले विगत ६ महिनादेखि घरमै दाम्लोमा बाँधेर राखेको थियो । उनको त्यो अवश्था देखेपछि जिल्लास्थित अधिकारकर्मी, पत्रकार, प्रहरी र स्थानीय प्रशासनले उद्धार गरेका थिए ।

सिन्धुलीको लदाभिर गाविसबाट ०७० फागुनमा मनोजकुमार खड्कासँग सृजना विवाह बन्धनमा बाँधिएकी थिइन् । २०७० चैतमा नोवेल अस्पताल विराटनगरमा भर्ना गरे पनि एकमहिना आर्थिक अभावका कारण डिस्चार्ज गरिएको उनको परिवारले जानकारी दिएको छ ।

सृजना गर्भवती भएको दुई महिनापछि एकाएक हराएका अनका पतिको अहिलेसम्म अत्तोपत्तो छैन ।

भरत खड्का