दाङ बन्दले जनजीवन प्रभावित

संविधान संशोधन विधेयक फिर्ताको माग गर्दै युवा संघ नेपाल र अनेरास्ववियु दाङले मङ्सिर २२ गते गरेको दाङ बन्दले जिल्लाको जनजीवन प्रभावित भयो । बन्दकर्ताहरूले विहानैदेखि पूर्वपश्चिम राजमार्गको भालुवाङ-लमही-अमेलिया सडक खण्ड र घोराही-तुलसीपुर तथा अमेलिया-सल्यान राप्ती राजमार्गमा ठाउँ ठाउँमा अवरोध सिर्जना गरी सार्वजनिक यातायात ठप्प पारेका थिए । बन्दकै कारण जिल्लाका विद्यालय, कलकारखाना तथा जिल्लाका घोराही, लमही, तुलसीपुर, नारायणपुर, भालुवाङ बजार खुल्न सकेनन् । विद्यालय नखुल्दा विद्यार्थीहरू मर्कामा परे भने गन्तव्यमा हिँडेका यात्रु बाटोमै अलपत्र परेका थिए । पूर्वपश्चिम राजमार्गको अमेलिया खण्ड र भालुवाङमा दिनभर लामो दुरीका सवारी साधन चल्न सकेनन् । यसैबिच तुलसीपुरमा बन्द अवज्ञा गरेको भन्दै मोटरसाइकल रोक्न खोज्दा एक आन्दोलनकारी कुटिएका छन् ।

photo20161207dang

घटनामा नेकपा एमाले पवननगर गाउँ कमिटीका अध्यक्ष ३५ वर्षीय खुमप्रसाद भण्डारी गम्भीर घाइते भएको इलाका प्रहरी कार्यालय, तुलसीपुरका इन्स्पेक्टर खुमानन्द पाण्डेले बताए । उनको राप्ती अञ्चल अस्पताल तुलसीपुरमा उपचार भइरहेको छ । बिहान ६ वजेदेखि सुरु भएको बन्द वेलुका ४ बजे खुलेपछि बाटोमा रोकिएका सवारी साधन गन्तव्यमा हिँडेका छन् ।

पाल्पा प्रतिनिधि यज्ञमूर्ति तिमिल्सिनाका अनुसार आठ दिनदेखिको बन्दले पाल्पाको जनजीवन थप कष्टकर बन्दै गएको छ ।

मङ्सिर २२ गते बन्दकर्ताहरूले जिल्लाका सरकारी कार्यालय समेत बन्द गराएका छन् । त्यस्तै बिहानैदेखि जिल्ला प्रशासनमा धर्ना दिएका छन् । निरन्तरको बन्दले शिक्षा, स्वास्थ्य र व्यापार व्यवसायमा असर परेको छ भने सर्वसाधारणको दैनिकीसमेत अस्तव्यस्त बन्दै गएको छ । बन्दले पाल्पामा विद्यालय, क्याम्पस खुल्न सकेका छैनन् । सार्वजनिक सवारी पनि चलेका छैनन् । विद्यालयमा पढाई नभएपछि विद्यार्थीहरू खेलेर दिन बिताउन बाध्य छन् ।

photo20161207palpa

बिरामीहरूले समेत समयमा सवारी साधन नपाउँदा कष्ट बेहोर्नु परेको छ । एम्बुलेन्ससमेत ग्रामीण क्षेत्रमा जान नमान्दा सास्ती खेप्नु परेको गुनासो बिरामीको रहेको छ । व्यवसायिक च्याउ, तरकारी, सुन्तला खेती गर्नेहरूले बजारसम्म पठाउन पाएका छैनन् भने साना तथा घरेलु उद्योग बन्द भएपछि त्यहाँ काम गर्ने कामदारले छाक टार्न नै मुश्किल परेको गुनासो गरेका छन् ।

सत्तारुढ काङ्ग्रेस, प्रमुख विपक्षी एमालेलगायतका राजनीतिक दलका साथै युवा, विद्यार्थीले निरन्तर बन्दको कार्यक्रम गर्दै आएका छन् । उनीहरूले आन्दोलनलाई अझै सशक्त बनाउने बताएका छन् । मङ्सिर २२ गते बसेको जिल्ला स्तरीय सङ्घर्ष समितिको बैठकले मङ्सिर २५ गतेसम्म बन्द यथावत् राख्ने निर्णय गरेका छन् । २५ गते जिल्ला सदरमुकाम तानसेनमा मानव साङ्लो प्रदर्शन गरिने नेकपा एमाले पाल्पाका अध्यक्ष नारायण आचार्यले बताए । बन्दले सदरमुकाम तानसेन र ग्रामीण भेगको जनजीवन कष्टकर बनेको छ भने शिक्षा, स्वास्थ्य र उद्योग व्यवसायमा झनै असर पुगेको छ ।

गुल्मी प्रतिनिधि टोपलाल अर्यालका अनुसार बन्दकर्ताले आमसभा तथा जनप्रदर्शन गरेका छन् । आठ दिनदेखि जिल्ला बन्द र आन्दोलन भइरहँदा पनि सरकारले आफ्ना माग नसुनेको भन्दै सरकारलाई सुनाउन सिठ्ठी जुलुस निकालिएको आन्दोलन परिचालन कमिटीका संयोजक भुवन प्रसाद श्रेष्ठले बताए । उनले आफ्नो माग पूरा नभएसम्म जारी आन्दोलन र कार्यक्रम नरोकिने बरु अझ सशक्त बनाउने बताए । जारी आन्दोलनका कारण दैनिक जीवन निकै कष्टपूर्ण बन्दै जान थालेको छ । अनिश्चतकालीन जिल्लामा दैनिक ज्याल मजदुरी गर्ने मजदुर, स्वेदश तथा विदेशबाट जिल्ला भित्रिने र बाहिने व्यक्तिहरू मर्कामा परेका छन् । सरकारी कार्यालयका सेवाहरू पूर्णरूपमा ठप्प भएका छन् ।


अनलाइन डेस्क