समाचारहरू

मलङ्गवा नगरपालिका–७ माइती घर भएकी २३ वर्षीया सैमुल खातुनलाई दाइजो बापत एउटा इन्डियन मोटरसाइकल र नगद ५० हजार रुपियाँ नल्याएकोमा गोडैता नगरपालिका–१० सिसौटियाका २५ वर्षीय पति मो.समिर खानले कुटपिट गरेको आरोपमा पीडितले ईलाका प्रहरी कार्यालय गोडैतामा माघ १० गते उजुरी दिएकी छिन् ।

पतिको कुटपिटबाट खातुनको बायाँ हातमा र बायाँ खुटामा चोट लागेको तथा बायाँ हातमा तीन ओटा टाँका लगाइएको पीडित महिलाकी बुबा ४७ वर्षीय मो. नसारुदिन खानले बताउनु भयो ।

पीडितको उपचार माघ चार गते सर्लाही जिल्ला अस्पताल मलङ्गवामा गरीएको पिडितकी बुबाले बताउनुभयो ।

२०७७ फागुन महिनामा सैमुल खातुन र मो.समिर खानबीच मुस्लिम परम्परा अनुसार निकाह भएको थियो । निकाहमा एक लाख पचास हजार रुपियाँ, आठ आना सुन, घरका अन्य सरसमान दिएपनि थप दाइजो नल्याएको भन्दै शारीरिक तथा मानसिक यातना दिने गरेको पीडित पक्षको आरोप छ ।

घटनाको अनुसन्धान प्रक्रिया अगाडि बढाइएको ईलाका प्रहरी कार्यालय गोडैताका सई रामप्रवेश यादवले जानकारी दिनु भयो । हाल आरोपित ‘फरार’ रहेकोले खोजी कार्य भइरहेको उहाँले बताउनु भयो ।

बधन साह