समाचारहरू

गोडैता गाउँपालिका–७ की २२ वर्षीया सूर्यकला कुमारी साहलाई २५ वर्षीय पति शम्भु कुमार साह र ४४ वर्षीया सासू मखनीया देवी साहले कुटपिट गरेको आरोपमा पीडित पक्षले इलाका प्रहरी कार्यालय गोडैतामा ०८० फागुन २७ गते उजुरी दिनु भएको छ ।

थप दाइजोमा पीडितका बुबाले तीन तोला सुन र १० तोला चाँदी नदिएको भन्दै आरोपितहरूले फागुन १९ गते पीडितलाई गालीगलौज गर्नुका साथै कुटपिट समेत गरी शारीरिक तथा मानसिक यातना दिइ घरेलु हिंसा गरेको पीडितकी ४३ वर्षीय आमा संगीता देवी साहको आरोप रहेको छ ।

पीडित महिलाको उपचार फागुन २० गते देखि २३ गतेसम्म जिल्ला अस्पताल मलंगवामा भयो । उपचार पश्चात पीडित माइती घर महोत्तरी जिल्ला सोनमा गाउँपालिका–३ मा बस्दै आइरहेको पीडित महिलाले बताउनु भयो ।

पीडित र आरोपित साहबीच ०७९ वैशाख १६ गते विवाह भएको थियो । विवाहमा नगद २ लाख ५० हजार रुपियाँ र फर्निचरका सामग्री दिएपनि थप दाइजो बापत सुन र चाँदी नदिएको भन्दै आरोपितहरूले पीडितलाई कुटपिट गर्नुका साथै शारीरिक तथा मानसिक यातना दिने गरेको पीडित महिलाले बताउनु भयो ।

उजुरी पश्चात आरोपितहरू फरार रहेकोले खोज तलास भइरहेको इलाका प्रहरी कार्यालय गोडैताका असई विश्वनाथ यादवले जानकारी दिनु भयो ।

बुधन साह