दाइजो नल्याएको भन्दै कुटपिट, घटनाका आरोपित पतिविरूद्ध उजुरी

 

कविलासी नगरपालिका–८ माइती भएकी २२ वर्षीया काजलकुमारी महतोलाई दाइजो बापत एक थान इन्डियन मोटरसाइकल र नगद ५० हजार रुपियाँ नदिएको भन्दै चैत १० गते कुटपिट गरेको आरोपमा पीडितले मलङ्गवा नगरपालिका–७ ठुलो मुसैलीका २३ वर्षीय पति रामनरेश महतोविरूद्ध जिल्ला प्रहरी कार्यालय मलङ्गवामा चैत १५ गते उजुरी दिनु भएको छ ।

पतिको कुटपिटबाट काजलकुमारीको टाउकोमा चोट त्यसैगरी दाहिने हातको औँलामा दुई ओटा टाँका र बायाँ गोडामा तीन ओटा टाँका लगाइएको पीडितका बुबा रामबाबु महतोले बताउनु भयो ।

घाइतेको सामान्य उपचार जिल्ला अस्पतालमा गरेपछि थप उपचारका लागि नेशनल मेडिकल अस्पताल बीरगंजमा लगेको पीडित महिलाको बुबा रामबाबुले जानकारी दिनु भयो ।

काजल कुमारी र रामनरेशबिच २०७७ जेठ २० गते हिन्दु परम्परा नुसार विवाह भएको थियो । विवाहमा ५० हजार रुपियाँ र चार अना सुन दिएपनि काजलकुमारीलाई थप दाइजो नल्याएको भन्दै कुटपिट गर्ने गरेको पीडित महिलाका बुबा रामबाबुले बताउनु भयो ।

आरोपित फरार रहेकाले खोजतलास गरी अनुसन्धान प्रक्रिया अगाडि बढाइएको जिल्ला प्रहरी कार्यालय मलङ्गवाका इन्स्पेक्टर डाचाशङ्कर यादवले जानकारी दिनु भयो ।


बुधन साह