दाइजो नल्याएको आरोपमा महिलाको हत्या गरेको आरोप

  ०७३ भदौ २७ गते

लुम्बिनी नपा-४ पडरियाकी २८ वर्षीया नाजमा खातुनलाई दाइजो नल्याएको आरोपमा भदौ २२ गते परिवारजनले उनको हत्या गरेको खातुनका माइतीपक्षले आरोप लगाएको छ ।

पीडित महिलाका २९ वर्षीय पति एहसानुल्लाह मुसलमान र उनका परिवारले दाइजोमा चार पाङग्रे सवारी साधन मागेको र सो दिन नसकेको भन्दै पटकपटक कुटपिट गरी यातना दिने गरेको मृतकका दाजु बदरे आलमले बताए ।

'बहिनीलाई मारेर लुकीछिपी दाहसंस्कार गर्न लागेका रहेछन् । नमारेको भए किन लुक्नु ?'-बदरेले भने-'बहिनीको स्वभाविक मृत्यु नभई हत्या नै गरिएको हो ।'

मृतक खातुन केही समय अघि मात्रै माइतीघरबाट आफ्नै घर फर्केकी थिइन् । सधैं कुटपिट खाएर आजित भएकी खातुन ६ महिनादेखि माइतीघरमा बस्दै आएको र इष्टमित्रको आग्रहमा उनलाई घरमा पठाइएको मृतकका दाजु बदरे आलमले बताए ।

'२३ गते बिहानै छिमेकीहरूबाट बहिनीको मृत्यु भएको छ । दाहसंस्कार गर्नका लागि लैजाँदै छन् भन्ने खबर पाएपछि धकधई इलाका प्रहरी कार्यालयमार्फत इलाका प्रहरी कार्यालय लुम्बिनीलाई आग्रह गरें । त्यसपछि दाहसंस्कार रोकेर प्रहरीले अनुसन्धान थालेको छ ।'

प्रहरी घटनास्थलमा पुग्दा पीडित महिलाको शरीरभरी निलडाम र चोटपटकहरू भएको देखेपछि शवको पोष्टमार्टमका लागि भैरहवास्थित भिम अस्पताल पठाइएको जिल्ला प्रहरी कार्यालयका एसपी बुद्धिराज गुरुङले जानकारी दिए । सोही दिन मृतकको शवको पोष्टमार्टम गरिएको थियो ।

इलाका प्रहरी कार्यालय लुम्बिनीका इन्स्पेक्टर दिलीपराज झाले मृतकको घर पुग्दा जेठाजु तबारक मुसलमान र पति एहसानुल्लाह मुसलमान फरार रहेको र ससुरा जलालुद्दिन मुसलमानलाई भारततिर भाग्दै गरेको अवस्थामा गिरफ्तार गरिएको बताए ।

पीडित महिलाका सात वर्षीय र एक वर्षीय छोरा रहेका छन् ।


रीमा बि.सी.