समाचारहरू

नेपालगञ्ज उमनपा-१९ बालेगाउँकी १८ वर्षीया आसरून अन्सारीलाई दाइजो नल्याएको आरोपमा साउन २३ गते २१ वर्षीय पति बसिम अन्सारी, ४६ वर्षीया सासू बाबादैया जोलहा, ५१ वर्षीय ससुरा सब्वीर अन्सारी र ३२ वर्षीय जेठाजु नसिम अन्सारी कवाडीले कुटपिट गरेको पीडितले बताएकी छन् ।

दुवै आँखामा गहिरो चोट लागेका कारण पीडित घाइतेको भेरी अञ्चल अस्पताल नेपालगञ्जमा उपचार भइरहेको छ । आर्थिक अभावका कारण उपचारमा समस्या भएको पीडितकी आमा इमानन् अन्सारीले गुनासो गरिन् । कुटपिटबाट उनको हात, गोडा र शरीरका विभिन्न अङ्गमासमेत चोट लागेको छ ।

दाइजोको निहुँमा विगत चार महिनादेखि कुटपिट र घरेलु हिंसा सहँदै आएकी आसरूनलाई पछिल्लो पटक साउन २३ गते राति चार लाख रूपियाँ दाइजो नल्याएको भन्दै परिवारजनले कुटपिट गरी घाइते बनाएको पीडितले बताइन् । उनले भनिन्- 'म त्यो घरमा जान्न । गयो भने मार्छन् । माइतीमा आमासँगै बस्छु । तिनीहरूलाई जेल हाल्नु पर्छ ।'

घटना भएकै दिन राति पीडित पक्षले प्रहरीमा खबर गरेपछि पीडितका पति बसिम र सासु बाबादैयालाई जिल्ला प्रहरी कार्यालयले गिरफ्तार गरेको तथा ससुरा र जेठाजु फरार रहेको जिल्ला प्रहरी कार्यालयका एसपी टेकप्रसाद राईले बताए । आरोपित विरूद्ध ज्यान मार्ने उद्योगमा मुद्दा दर्ता गरिएको जिल्ला प्रहरी कार्यालयले जनाएको छ ।

दुई वर्षअघि मागी विवाह गरेकी बसिम विवाहपछि वैदेशिक रोजगारीका लागि विदेशमा गएकी थिइन् । घर फर्केपछि चार महिना यता पटकपटक दाइजो नल्याएको भन्दै परिवारका सदस्यले कुटपिट गर्ने गरेको र गाँउ समाजमा करिब १० पटक मिलापत्र गराइएको पीडितका दाजु सम्साद अलीले बताए । पछिल्लो पटक साउन २० गते जिल्ला प्रहरी कार्यालयमा समेत मिलापत्र गराइएको उनले जानकारी दिए ।

नेपालगञ्ज उपमनपा-२१ जैसपुर माइती घर भएकी आसरूनका एक वर्षका छोरा छन् । माइती पक्ष आर्थिक रूपले कमजोर रहेको र विवाहको समयमा कुनै किसिमको आर्थिक लेनदेनको कुरा नभएको पीडितकी आमा इमानन्ले बताइन् ।

विनोद पाण्डे