समाचारहरू

वृन्दावन नपा–६ सिसवा धमौराकी २० वर्षीया सविता भनिने सन्जुकुमारी दासलाई साउन २ गते दाइजो कम ल्याएको आरोपमा हत्या गरेको भन्दै मृतकका माइती पक्षले साउन ६ गते दिएको उजुरी इलाका प्रहरी कार्यालय गरुडाले लिन नमानेको पीडित पक्षको आरोप छ ।

कटहरीया नपा–५ बलिरामपुर माइती रहेको सन्जुकुमारी र वृन्दावन नपा–६ का २५ वर्षीय रमाकान्त दासबिच एक महिना अगाडि विवाह भएको थियो ।

विवाह भएदेखि नै दाइजो कम ल्याएको निहुँमा सन्जुकुमारीलाई मानसिक तनाव दिने गरेको पीडित पक्षको आरोप छ ।

आरोपित रमाकन्तले साउन २ गते राति ११ बजे फोन गरेर तपाइँको बहिनीको मृत्यु भएको भनी जानकारी गराउँदै फोन काटेको मृतक सन्जुकुमारीका दाइ रामप्रवेश दासले बताउनु भयो ।

शवको पोष्टमार्टम साउन ३ गते टिचिङ अस्पताल महाराजगञ्ज, काठमाडौँमा गरी सोही दिन मृतकका ससुरा चन्देश्वर दासले शव बुझी साउन ४ गते गाउँमा ल्याएर दाह संस्कार गरेको पीडित पक्षले जनाएको छ ।

मृतकका ससुरा चन्देश्वर दास, सासू शिवादेवी दास, देवर उमाकान्त दास, नन्द रञ्जना दास, ठुला ससुरा विन्देश्वर दासले रन्जुकुमारीको हत्या गरेको माइती पक्षको आरोप छ ।

मृतक सन्जुकुमारीका दाइ रामप्रवेश दासले साउन ४ गते र साउन ६ गते इलाका प्रहरी कार्यालय गरुडामा दिएको उजुरी लिन नमानेको पीडित पक्षको आरोप छ ।

प्रहरीले रिपोर्ट आएपछि मात्र उजुरी दर्ता गर्ने भन्दै टारेको पीडित पक्षले जनायो ।

घटनाको प्रारम्भिक अनुसन्धानपछि मात्र उजुरी दर्ता गरिने इलाका प्रहरी कार्यालय गरुडाका डिएसपी बरुण सिंहले बताउनु भयो ।

कोपिला तिमल्सिना