समाचारहरू

दाइजो तथा घरेलु हिंसाविरुद्धको कसुरमा रामगोपालपुर नपा–५ का डा. पंकज चौधरीलाई जिल्ला अदालत महोत्तरीका न्ययाधीश हरिप्रसाद शर्मा उपाध्यायको एकल इजलासले पुस २२ गते पुर्पक्षका लागि थुनामा पठाउन आदेश दिएको छ ।

पति पंकज विरुद्ध पत्नी नेहाले ०७९ असोज २१ गते महोत्तरी जिल्ला अदालतमा घरेलु हिंसा विरुद्ध निवेदन दिई कात्तिक ४ गते उजुरी गर्ता गराएकी हुन् भने मङ्सिर १९ गते सोही अदालतमा दाइजोका विरुद्धमा पनि मुद्दा दायर गरेकी थिइन् ।

गत वर्षको फागुन २५ गते औरही–१ की नेहा र रामगोपालपुर नपा–५ का डा. पंकजबीच सामाजिक परम्परा अनुसार विवाह भएको थियो । त्यसको ७ महिनापछि नेहाले गत कात्तिक २५ मा फेसबुक मार्फत दाइजोका नाममा पति र परिवारका अन्य सदस्यले आफूमाथि हिंसा गरिरहेको सार्वजनिक गरेकी थिइन् ।

पंकजले आफूलाई घरमै छाडेको र काठमाडौंमा सँगै राख्न अनुरोध गर्दा दाइजोमा घर माग्दै हिंसा गरेको भन्दै नेहाले जिल्ला प्रहरी कार्यालय महोत्तरीमा जाहेरी दिएकी थिइन् । साथै पंकजले विवाहअघि नै २५ लाख रुपियाँ दाइजो लिएको नेहाको दाबी छ ।

नेहाको तर्फबाट वकालत गरिरहेकी वकिल रिंकु यादवका अनुसार नेहाले पति पंकज र परिवारका सदस्य विरूद्ध बकसपत्र बदर, जालसाजी, घरेलु हिंसा, दाइजो, मानाचामल र अंश मुद्दा दिएकी छिन् भने उनका पति पंकजले सम्बन्ध विच्छेदको मुद्दा दायर गरेका छन् ।

जाहेरीवाली नेहाको तर्फबाट महोत्तरी जिल्ला सरकारी वकिल मनोज कुमार गुप्ता र रिंकु कुमारी यादवले बहस गरेका थिए भने पंकजको तर्फबाट विजय ठाकुर र शंकर गुवाजुले बहस गरेका थिए ।

 

अजयकुमार साह