समाचारहरू

कौडेना गाउँपालिका-५ मोतिपुरकी २३ वर्षीया पुजा महतो नुनीयालाई ०८१ असार ३ गते थप दाइजोको निहुँमा कुटपिट गरेका आरोपित पति २६ वर्षीय रामबाबु महतो नुनीयाविरुद्ध पीडितले असार १२ गते इलाका प्रहरी कार्यालय कौडेनामा उजुरी दिनु भएको छ ।

पीडित र आरोपितबीच ०७९ जेठ १६ गते विवाह भएको थियो । विवाहमा १ लाख रुपियाँ नगद र एक थान ईन्डियन नम्बर प्लेट भएको मोटरसाइकल दिएको पीडितका बुबा मलंगवा नगरपालिका वडा नं. ४ का ४६ वर्षीय राजेन्द्र महतोले बताउनु भयो । तर, थप दाइजो बापत नगद १ लाख रुपियाँ र पलङ्ग सेट नल्याएको भन्दै आरोपितले पीडितलाई गालिगलौज तथा कुटपिट गरी शारीरिक तथा मानसिक यातना दिएको उहाँको आरोप रहेको छ ।

कुटपिटका कारण घाइते भएकी पीडितको स्वास्थ्य उपचार असार ४ गतेदेखि ६ गतेसम्म सर्लाही जिल्ला अस्पताल मलंगवामा भयो ।

घटनापश्चात आरोपित महतो फरार रहेकोले खोजतलास भइरहेको इलाका प्रहरी कार्यालय कौडेनाका असई दिपलाल यादवले बताउनु भयो ।

बुधन साह