समाचारहरू

मौलापुर नगरपालिका–४ बौधा पतौराकी २४ वर्षीया माला भन्ने कविता साह र दुई वर्षीया छोरी आरोही साहलाई असार १५ गते राति कविताका २८ वर्षिय पति धीरेन्द्र साह र परिवारजनले हत्या गरेको पीडित पक्षको आरोप छ ।

मृतकका बुबा माधवनारायण नगरपालिका–५ मिठुअवाका विजयशङ्कर साहका अनुसार तीन वर्षअघि सामाजिक रीतिरिवाजमा धीरेन्द्र साह र कविता साहको विवाह भएको हो । विवाहअघि कबुल गरेको दाइजो दिन नसकेको कारण छोरी र नातिनीको हत्या ज्वाँइ धीरेन्द्र साह र ज्वाइँका परिवारले गरेको विजयशङ्कर साहको आराेप रहेको छ । मोटरसाइकल, पलङ, भै‌सी, सिक्री माइतीबाट लिएर आइज भन्दै ज्वाँइले छोरीमाथि दबाब दिँदै आएको र आफूले दिन नसकेको कारण नातिनीसहित छोरीलाई कुटपिट गरी हत्या गरेको साहको आरोप छ ।

बिहान ३ बजेको समयमा छिमेकीले फोन गरेर छोरी र नातिनीलाई आरोपित र आरोपितका परिवारले कुटपिट गरी हत्या गरेको जानकारी दिएको साहको भनाइ छ । त्यसपछि प्रहरीलाई खबर गरेर मौलापुर पुगेको उहाँले बताउनु भयो ।

जिल्ला प्रहरी कार्यालय रौतहटका एसपी वीरबहादुर बुढामगरले प्रहरी घटनास्थलमा पुगेर अनुसन्धान गरिरहेकोे बताउनु भयो । पत्नी र छोरीको हत्यापछि आरोपित र आरोपितको परिवारका सदस्य फरार रहेकाले खोजी कार्य भइरहेको एसपी बुढामगरले जानकारी दिनु भयो ।

मधेस प्रदेश कार्यालय, जनकपुरधाम