समाचारहरू

दाइजो नल्याएको आरोपमा घरपरिवारबाट कुटपिट गरिएको घटना सम्बन्धमा नेपालगञ्जस्थित अधिकारकर्मीहरूले गम्भीर ध्यानाकर्षण भएको जनाएका छन् ।

साउन २६ गते प्रेस विज्ञप्तिमार्फत नेपालगञ्ज उमनपा-१९ बाले गाउँकी १८ वर्षीया आसरुन अन्सारीलाई दाइजो नल्याएको आरोपमा साउन २३ गते राति पति वसिम जोलहा, सासु बाबादैया जोलहा, ससुरा सब्बीर जोलहा र जेठाजु नसिम जोलहाले गरेको कुटपिटबाट उनको दुवै आँखामा गहिरो चोट लागेको छ । घाइतेको भेरी अञ्चल अस्पतालमा उपचारार्थ भर्ना भएको घटना प्रति अधिकारकर्मीहरूले गम्भीर ध्यानाकर्षण भएको जनाएका हुन् ।

इन्सेक मध्यपश्चिमाञ्चल क्षेत्रीय कार्यालयका संयोजक भोला महत, बी-ग्रुपका गोपालनाथ योगी, सिविनका सिद्धराज पनेरु, हिमराइट्सका प्रकाश उपाध्याय, आइएचआरसीका विश्वजीत तिवारी, माइती नेपालका केशव कोइराला, गैसस महासङ्घका जिल्ला अध्यक्ष प्रमोद रिजाल, मानव अधिकार एलायन्सका प्रभातकुमार ठकरी, एडभोकेसी फोरमका बसन्त गौतम, पुनारावेदन बार एशोसियसनका अध्यक्ष बलबहादुर चन्द, नेपाल मुस्लिम समाज विकास चेतना केन्द्रकी रुवि खान, फातिमा फाउन्डेशनकी कावा अध्यक्ष मैमुना सिद्धिकीद्वारा संयुक्त विज्ञप्ति जारी गरेर घटनाको भत्सर्ना गरिएको हो ।

जारी विज्ञप्तिमा घटनाको तत्काल अनुसन्धान गरी संलग्नहरूलाई कानुनी कारबाही गर्नु पर्ने माग गरिएको छ । यसैगरी पीडितलाई न्यायको अनुभूति दिलाई कानुनी राज्यको अनुभूति दिलाउन र दिनप्रतिदिन महिलामाथि बढदै गएको हिंसाका घटनामा संलग्नलाई कानुनी दायरामा ल्याई कारबाही गर्नका लागि प्रहरी प्रशासनसँग अधिकारकर्मीहरूले माग गरेका छन् ।

विनोद पाण्डे