समाचारहरू

दसैँ विदा सकिसक्दा पनि विद्यालयमा पठनपाठन सुरू भएको छैन । दसैँ विदापछि असोज ३० गतेबाट विद्यालय खुलेर पठनपाठन हुनुपर्ने भएपनि कार्तिक ५ गते सम्म पनि विद्यालयमा पठनपाठन हुन नसकेको शभ्मुनाथ ज्ञानकुञ्ज माध्यामिक विद्यालयका प्रधानाध्यापक तुलाराज न्यौपानेले बताए ।

उनले भने-'विद्यालय खुला भए पनि विद्यार्थी आउँदैनन् अब तिहारपछि मात्र पूर्ण रूपमा पठनपाठन हुने जस्तो देखिन्छ ।' न्यौपानेका अनुसार विद्यार्थी नै पढ्न नआएकाले पठनपाठन नभएको हो ।

कर्णाली अञ्चलमा फागुन महिनादेखि शैक्षिक सत्र सुरू हुने र पुस ५ गते शैक्षिक सत्र सम्पन्न हुने व्यवस्था छ । उक्त अवधिमा २ सय दिन विद्यालय खुल्नु पर्ने, १ सय ९२ दिन पठनपाठन हुनुपर्ने व्यवस्था रहेपनि त्यसो हुन नसकेको भवानी प्रावि तातोपानीका शिक्षक अभिभावक सङ्घका पूर्व अध्यक्ष धनविर परियारले बताए ।

हिमशिखर उच्च माध्यामिक विद्यालय कक्षा १० मा अध्ययनरत मुनबहादुर नेपालीका अनुसार शिक्षक र विद्यार्थी दुवैको विद्यालयमा उपस्थिति नभएका कारण पठनपाठन हुन नसकेको हो ।

निमित्त जिल्ला शिक्षा अधिकारी तुलराज चौलागाईले दसैँ विदा पछि विद्यालय सञ्चालनमा रहेको बताए । उनले भने-'शिक्षकसँग बुझदा विद्यालयमा विद्यार्थीहरू उपस्थित नभएका कारण पठनपाठन पूर्ण रूपमा हुन सकेको छैन । विद्यालय सञ्चालनका लागि सबै विद्यालयमा परिपत्र गरेका छौँ र विद्यालय व्यवस्थापन समिति पूनर्गठनका लागि स्रोत व्यक्तिहरूलाई पनि विद्यालयमा खटाएका छौँ ।'

मानदत्त रावल