समाचारहरू

पाटन नगरपालिका क्षेत्र भित्र वर्षोदेखि दलित समुदायलाई थप अपमानित हुने गरी राखिएका २३ ओटा गाउँहरुको नाम परिवर्तन गरिएको छ ।

पाटन नगरपालिका–५ का गणेश वडलाई कतै जाँदा आफ्नो गाउँको परिचय दिँदा अपमानित हुने डरले गाउँको परिचय नै लुकाउनु पर्ने बाध्यता थियो । तर, अहिले भने उहाँको गाउँको नाम सिर्जना टोल नामाकरण गरिएपछि आफ्नो गाउँको परिचय दिन र नाम बताउन गर्भ महसुस भएको उहाँ बताउनु हुन्छ ।

दलितलाई होच्याउने र अपमानित हुने गरी राखिएका, डुमेउडा, लुहार भ्वाँ, भुलेउडा जस्ता दलितबस्तीका अपमानित नामहरु फेरिएका छन् । अहिलेसम्म २३ ओटा दलितबस्तीका अपमानित नाम परिर्वतन गरिएको पाटन नगरपालिकाका उपप्रमुख कमल बोहराले बताउनु भयो ।

कुनै पनि वहानामा जातीय विभेद गर्नु कानुनी रुपमा दण्डनीय र समाजिक रुपमा अस्वभनिय भए पनि पाटन नगरपालिका क्षेत्रमा वर्षोदेखि दलित समुदायलाई थप अपमानित गरिने गरी  दलितबस्तीका गाउँहरुको नामाकरण गरिएकोले नगर कार्यपालिकाबाट निर्णय नै गरेर दलितबस्तीका अपमानित नामहरु परिर्वतन गर्ने कार्यक्रम सुरु गरिएको उपप्रमुख बोहराले बताउनु भयो ।

पाटन नगरपालिका–५ स्थित दलितबस्तीको नाम डुमेउडाबाट फेरेर नयाँ नाम रानीघाटको साइनबोर्ड नै झुण्ड्याएको छ भने पाटन नगरपालका–६ स्थित ६ ओटा टोल र वाडा नम्बर ७ स्थित तीन ओटा टोल गरी २३ ओटा दलितबस्तीका नाम परिवर्तन गरिएको छ ।

नगरपालिकाबाट उपप्रमुखको टोली आएर दलितबस्तीका अपमानित नाम फेरेर रामपुर राखिएको पाटन नगरपालिका–१ का दलितराम बिकले बताउनु भयो ।

उहाँले भन्नु भयो– ‘उपप्रमुख आफैले नै नयाँ साइनबोर्ड बोकेर आउनु भयो । हामीले त कुनै योजनाको साइनबोर्ड होला भन्ने सोचेका थियौँ । तर, त्यो साइनबोर्ड त हाम्रै बस्तीको नयाँ नाम रहेछ । दलितबस्तीका अपमानजनक नाम फेरिएकोमा असाध्यै खुसी लागेको छ । ’

समाजमा अझै पनि जातीय विभेद कायमै रहेकोले नगरपालिकाले साइनबोर्डसँगै दलितलाई आत्मनिर्भर बन्न परम्परागत सीपलाई आधुनिकीकरण गर्न सहयोग गर्नु पर्ने उहाँको भनाइ छ ।

दलित समुदायको समाजिक र आर्थिक शसक्तीकरणका लागि नागरपालिकाले नीति तथा कार्यक्रमहरु बनाएर उहाँहरुको शिप र क्षमताको अभिबृद्धि गरी आत्मनिर्भर बनाउने योजना बनाएको पाटन नगरपालिकाका उप्रप्रमुख कमला बोहराले बताउनु भयो ।

नरी बडु