समाचारहरू

उर्लावारी नगरपालिका-१ की ६२ वर्षीया ज्येष्ठ नागरिक शोभा सुन्दास(परियार) ले दलित भएकै कारण विराटनगर महानगरपालिका-१ पुष्पलाल चोकस्थित जागृति वृद्धाश्रमले राख्न अस्वीकार गरेको आरोप लगाउनु भएको छ ।

दलित भएको भन्दै वृद्धाश्रमले राख्न अस्वीकार गरेपछि पीडितले वृद्धाश्रम र वृद्धाश्रम सञ्चालक समिति अध्यक्ष भुवनेश्वरी आर्चायविरूद्ध ०८० मङ्सिर २० गते जिल्ला प्रहरी कार्यालयमा उजुरी दिनु भएको छ ।

सन्तानविहीन शोभा उर्लावारीमा अलपत्र अवस्थामा बस्दै आउनु भएको थियो, ०८० मङ्सिर १४ गते उर्लावारी नगरपालिका-१ वडा कार्यालयबाट शोभालाई वृद्धाश्रममा राख्नका लागि सिफारिससहित लिएर आउँदा वृद्धाश्रमले दलित भएको भन्दै राख्न अस्वीकार गरेको उर्लावारी नगरपालिका-१ की वडासदस्य टीका भुजेलले बताउनु भयो ।

शोभा दलित भएको भन्ने थाहा पाएपछि, दलितलाई राखे वृद्धाश्रममा अरू बस्दैनन् भनि वृद्धाश्रमले मङ्सिर १४ गते फिर्ता गरेको वडासदस्य शोभाले बताउनु भयो ।

वृद्धाश्रम सञ्चालक समिति अध्यक्ष भुवनेश्वरी आर्चायले भने शोभाले लगाएको आरोप खण्डन गर्नु भएको छ । आचार्यले दलित भएकै कारण शोभालाई नराखिएको होइन, वृद्धाश्रम साँघुरो भएको र भरिएकाले शोभालाई नराखिएको बताउनु भएको छ ।

अधिकारकर्मी उमेश विश्वकर्माले जातीय छुवाछूत अनुसार दोषीलाई कारबाहीकोे माग गर्दै प्रहरीमा उजुरी दिएको बताउनु भयो ।

जिल्ला प्रहरी कार्यालयका डिएसपी रञ्जन दाहालले आरोपितविरूद्ध प्रहरीमा उजुरी आएको बताउनु भयो । डिएसपी दाहालले उजुरी र घटनाका विषयमा अनुसन्धान थालिएको बताउनु भएको छ ।

विनोद सुवेदी