समाचारहरू

सिगास गाउँपालिकाको थला गाउँको दलितबस्तीमा खानेपानीको समस्या भएको छ । यहाँका २ सय ५० घरधुरी एक घण्टा ओरालो झरेर ढडेखोलाको पानी पिउन बाध्य छन् । सिगास गाउँपालिका–६ थलागाउँस्थित दलितबस्तीमा खानेपानी नहुँदा समस्या भएको स्थानीय नरेन्द्र विकले बताउनु भयो । हिउँदमा खोलाको पानी र वर्षा सुरु भएपछि आकासे पानी पिउनुपर्ने बाध्यता रहेको छ ।

साँझ, बिहान र दिउँसो गरेर तीन पटक पानी भर्न जाँदा अधिकांश समय पानी भर्नमै बित्ने गरेको र चुनावका बेला सबैको घरघरमा धारा दिन्छौँ भनेर आएकार उम्मेदवारहरुलाई भोट दिएर जिताउँदा अहिले कसैले पनि पहल नगरेको उहाँले बताउनु भयो ।

निर्वाचनका बेला बिभिन्न राजनीतक दलका उम्मेदवारहरुले खानेपानीको धारा दिने आश्वासन दिनेगरेको भए पनि चुनाव जितेपछि वास्ता नगर्ने गरेको स्थानीयहरुको आरोप छ । स्थानीयदेखि संघ र प्रदेशका नेताले निर्वाचनका क्रममा गरेका वाँचा बिर्सिएको दलित समुदायको गुनासो छ ।

दलितबस्तीमै रहेको भूमिराज माध्यमिक विद्यालय, थलाका विद्यार्थी समेत खानेपानीबाट वञ्चित रहेको स्थानीय दीपेन्द्रसिंह धामीले बताउनु भयो । विद्यालयमा आउने खानेपानी जीर्ण हुँदा पानीको समस्या छ । २ सय ८४ जना विद्यार्थी अध्ययनरत रहेको यस विद्यालयमा खानेपानी नहुँदा  विद्यार्थीहरुले घरबाटै पानी बोकेर लैजानु पर्ने बाध्यता रहेको उहाँले बताउनु भयो ।

सिगास गाउँपालिका वडा नम्बर ६ का अध्यक्ष जेतबहादुर साउदले प्रयाप्त मात्रामा बजटे नहुँदा खानेपानी समस्या समाधान गर्न नसकिएको बताउनु भयो ।

उहाँले भन्नु भयो– ‘दतिलबस्तीमा खानेपानी समस्या छ ।  खानेपानी समस्या समाधान गर्न वडा कार्यालयमा प्रयाप्त बजेट छैन् । यो समस्या समाधान गर्न डिभिजन खानेपानी कार्यालयमा अनुरोध गरेका छौँ ।’ खानेपानी आयोजना सञ्चालनमा आएमा दलितबस्तीबाट एक घण्टाको दुरीमा रहेको करमडे मुहान र जोगेनी मुहानबाट पानी ल्याउन सकिने वडाध्यक्ष साउदले बताउनु भयो ।

नरी बडु