समाचारहरू

बंगलाचुली गाउँपालिका–८ गोठिवनमा दलितको पुण्य तीथिको भोज गैर दलितले साउन २३ गते बहिस्कार गरेको आरोप लगाएका छन् ।  पीडित पक्षका अनुसार उनीहरूले दलित र गैर दलितको लागि अलग–अलग भान्सा नबनाएको भन्दै भोज बहिस्कार गरेका हुन् ।

७६ वर्षीय भीमबहादुर विकको पुन्य तीथिको भोजलाई गोठिवन टोलका २८ जना गैरदलित समूदायले बहिस्कार गरेको पीडित परिवारका नारायण विकले बताउनु भयो । उहाँले जातीय छुवाछुत अन्त्य भएको लामो समय भइसक्दा पनि स्थानीय समुदायले आफूहरु माथि गम्भीर प्रकारको जातीय विभेद गरेको गुनासो गर्नु भयो ।

नारायणका हजुर बुवाको ०८० साउन १० गते मृत्यु भएको थियो ।  नारायणका अनुसार गैर दलित र दलितकालागि अलग भान्सा बनाउने भनी गैर दलित अगुवा सुर्यबहादुर केसीसँग सल्लाह माग्दा दलित र गैर दलितको अलग–अलग भान्सा  नबनाउने भए हामीले भोज वहिस्कार गर्दछौँ भनेका थिए । समाज २१ औं सताब्दीमा पुगी सक्दासमेत किन भान्सा दुईवटा बनाउने एउटै बनाउने भने पछि गैर दलितको आन्तरिक बैठक बसी भान्सा बहिस्कार गरेको पीडितले आरोप लगाउनु भयो ।

गोठिवनमा गाउँको परम्परा अनुसार गाउँमा कसैको मृत्यु भएमा हरेक घरबाट ३ सय रूपियाँका  दरले प्रत्येक घरबाट रकम उठाउने चलन रहेको भएपनि आफूहरु दलित भएकै कारण २८ घरले रकम पनि नउठाएको नारायणले गुनासो गरे ।

गोठिवन टोलका ३२ घर गैर दलितहरु मध्ये चार घरले मात्र गाउँको चलन अनुसार रकम उठाएको पीडित विकले बताउनु भयो ।  उक्त टोलमा २७ घर दलित र अन्य गैरदलितहरू रहेका छन् ।

आरोपित मध्येका हरीबहादुर घर्ती क्षेत्रीले ज्येष्ठ नागरिक र अग्रजहरूले अहिलेसम्म एउटै भान्सा प्रयोग नगरेको भएर आफूहरू सहभागी हुन नसकेको बताउनु भयो ।

बंगलाचुली गाउँपालिका–८ का वडा अध्यक्ष झविन्द्रबहादुर गाहामगरले यस घटनाको विषयमा आधिकारीकरुपमा जानकारी नभएको बताउनु भयो ।

शालिकराम डाँगी