दरबन्दी अनुसारका स्वास्थ्यकर्मी नहुँदा सेवाग्राही प्रभावित

  ०७९ माघ २५ गते

सिन्धुली अस्पतालमा दरबन्दी अनुसार स्वास्थ्यकर्मी नहुँदा स्वास्थ्य सेवाग्राहीले पाउने पर्ने सेवा प्रभावित भएको छ । अस्पतालमा करिव दुई महिना देखि भिडियो एक्सरे सेवा बन्द भएको छ । जसका कारण सेवा लिन पुगेका बिरामीहरू सेवा नलिई फर्कने गरेका छन् ।

अस्पतालका मेडिकल सुपरिटेण्डेण्ट उमेश प्रधानका अनुसार भिडियो एक्सरे गर्ने डाक्टरको अन्यत्र सरुवा भएपछि सेवा अवरुद्ध भएको छ । सेवा लिन आउने बिरामीहरूलाई सेवा प्रदान गर्न नसकिएको प्रधानले बताउनुभयो ।

यसैगरी स्वास्थ्यकर्मीको व्यवस्थापन गर्न नसक्दा अस्पतालमा सिटिस्क्यान सेवा तथा डायलोसिस सेवा सूचारु गर्न नसकिएको प्रधानले बताउनुभयो । कर्मचारी अभावमा केभिड अस्पतालमा रहेको स्वास्थ्य उपकरण सञ्चालन नहुँदा स्वास्थ्य उपकरणहरू बिग्रने अवस्थामा पुगिसकेका छन् ।

अस्पतालमा नै डाक्टरलाई आवास सुविधा नहुँदा सेवा प्रवाह झन् जटिल बन्दै गएको प्रधानले बताउनुभयो । डाक्टरहरूलाई अस्पताल परिसर भित्रै आवसको व्यवस्था हुनु पर्ने हो तर त्यसो नहुँदा डाक्टरहरू अस्पताल परिसर भन्दा बहिर डेरामा बस्नु पर्दा आपतकालीन उपचारहरूमा समेत समस्या हुने गरेको प्रधानको भनाई छ ।

मरिण गाउँपालिका–४ वाक्सिङटारकी २७ वर्षीया सीता तामाङको उपचारको क्रममा सिन्धुली अस्पतालका डाक्टरको लापर्बाहीले ०७९ माघ १८ गते मृत्यु भएको थियो ।

त्यसपछि स्वास्थ्यकर्मीले सिन्धुली अस्पतालमाबाट अन्यन्त्र सरुवा लिन बिदा लिने क्रम बढेकोले अस्पतालको सेवा प्रवाहमा समस्या थपिन पुगेको छ ।

सिन्धुली अस्पतालमा एकातिर पुर्ननिर्माणका कामले लथालिङ्ग देखिएको छ भने अर्कातिर दरबन्दी अनुसारका विषेशज्ञहरू नहुँदा समस्यामा जेलिएको छ ।

अस्पतालको समस्या समाधान गर्न जिल्लाका सङ्घ तथा प्रदेश सभाका सदस्यहरूलाई अनुरोध गरिएको मेडिकल सुपरिटेण्डेण्ट उमेश प्रधानले बताउनुभयो ।

सिन्धुली अस्पतालमा दरबन्दी अनुसारको स्वास्थ्यकर्मी नहुँदा बिरामीहरू उपचारको लागि बर्दिबास, धुलिखेल र काठमाडौँ जान बाध्य भएका छन् ।


नबिनबाबु अधिकारी