समाचारहरू

टीकापुर घटनाको अभियोगमा पुर्पक्षका लागि थुनामा रहेका रेशम चौधरीलगायत २४ जनाले फागुन २० गते साँझदेखि जिल्ला कारागार कैलाली भित्रै आमरण अनसन सुरू गरेका छन् ।

राष्ट्रिय जनता पार्टीको तर्फबाट कैलाली क्षेत्र नम्बर १ बाट प्रतिनिधि सभा सदस्यका लागि निर्वाचित चौधरीलाई निर्वाचित प्रमाणपत्र दिइनु पर्ने, उनको शपथ ग्रहणको व्यवस्था मिलाउनु पर्ने, टीकापुर घटनामा आरोपित २६ जनालाई तत्काल क्षतिपूर्तिसहित रिहा गर्नु पर्ने, थरूहटका माग सम्बोधन गर्नुपर्नेलगायतर्का माग राखी टिकापुर घटनाका आरोपित थुनुवाहरूले आमरण अनसन सुरू गरेको जिल्ला प्रहरी कार्यालय, कैलालीका डिएसपी सागर बोहराले बताए ।

प्रतिनिधि सभा सदस्यका लागि निर्वाचित चौधरीले फागुन १४ गते जिल्ला अदालत, कैलालीमा आत्मसमर्पण गरेका थिए । जिल्ला अदालत, कैलालीले चौधरीलाई पुर्पक्षका लागि कारागार चलान गरेपछि उनीसहित २४ जना आरोपित जिल्ला कारागार, कैलालीमा छन् भने दुई जना बालकलाई पोखरास्थित बालसुधार गृहमा राखिएको छ ।

थरूहट आन्दोलनका क्रममा नेपाल प्रहरीका वरिष्ठ प्रहरी उपरीक्षक लक्ष्मण न्यौपानेसहित सात सुरक्षाकर्मी र एक बालकको ०७२ भदौ ७ गते टिकापुरमा ज्यान गएको थियो ।

इन्सेक कार्यालय, धनगढी