समाचारहरू

द्वन्द्वकालीन समयमा आफन्त बेपत्ता भएको भन्दै स्थानीय शान्ति समिति तेह्रथुममार्फत उजुरी दिने पीडित परिवारहरूलाई बेपत्ता पारिएका व्यक्तिको छानबिन आयोगले थप प्रमाण पेश गर्न अनुरोध गरेको छ ।

स्थानीय शान्ति समितिमार्फत आफन्त बेपत्ता भएको भन्दै २० जनाले उजुरी दिएपछि बेपत्ता छानबिन आयोगले पीडित परिवारका सदस्यहरूलाई पत्रचार गरेरै थप प्रमाण पेश गर्न अनुरोध गरेको हो ।

आयोगले थप प्रमाण मागेपछि माघ २ गते सम्ममा ६ जना बेपत्ताका परिवारले आफूसँग भएको प्रमाण पेश गरेको स्थानीय शान्ति समिति तेह्रथुमका सचिव तुलसीराम रिमालले बताए ।

द्वन्द्वको क्रममा मोराहाङकी २४ वर्षीया नरमाया विश्वकर्मा, ह्वाकुका १६ वर्षीय पासाङदावा शेर्पा, पौठाकका २३ वर्षीय प्रकाशकुमार दाहाल र २४ वर्षीय प्रेमप्रकाश ढकाल, म्याङलुङ नपाका २० वर्षीय प्रकाश घिसिङ, ३० वर्षीय मानबहादुर बुढाथोकी, ४७ वर्षीय रामप्रसाद फुदोङ, १७ वर्षीय काशिराम गुरागार्इं र देविरमण निरौला, ईवाका २२ वर्षीय भवानीप्रसाद उप्रेती, जलजलेका भिमकुमारी विक, सिम्लेका २० वर्षीय महानन्द लिम्बु, मोराहाङका महेन्द्रबहादुर भुजेल, श्रीजुङका १८ वर्षीय रामकुमार लिम्बु र सुरेश लिम्बु, पिप्लेका विष्णुभक्त गड्तौला रहेको स्थानीय शान्ति समिति तेह्रथुमले जनाएको छ ।

भगिश्वर लिम्बू