समाचारहरू

त्रिशूली अस्पतालमा चिकित्सक अभाव हुँदा सेवाग्राहीलाई सेवा लिन सास्ती भएको छ । चिकित्सक अवाभका कारण सेवाग्राहीले सेवा प्राप्त गर्नका लागि एक हप्ताभन्दा बढी समय कुर्नुपर्ने अवस्था छ । चिकित्सक नभएको कारण जिल्लाको प्रमुख सरकारी अस्पताल त्रिशूली अस्पतालमा प्रसुती सेवा एक हप्तादेखि बन्द भएको हो ।

प्रसुती सेवा विभागमा कार्यरत चिकित्सकको सरुवा भएको र अस्पतालमा अन्य प्रसुती विशेषज्ञ चिकित्सक नभएको कारण प्रसुती सेवा बन्द गर्न बाध्य भएको अस्पतालका मेडिकल प्रमुख डा. प्रतीक सिंहले बताउनु भयो । गत साउन ३० गतेबाट बन्द गरिएको प्रसुती सेवा चिकित्सक अभावमा सञ्चालनमा ल्याउन नसकिएको र कहिलेबाट सेवा सुरु हुन्छ भन्ने एकिन नभएको डा. सिंहले बताउनु भयो ।

'कार्यरत चिकित्सकको सरुवा भएपछि अर्को चिकित्सक पठाइदिनु पर्‍यो भनेर हामी मन्त्रालय धाइरहेका छौँ । डाक्टर नलिई नजाने भनेर प्रदेश स्वास्थ्य मन्त्रालय आएका छौँ', डा. सिंहले भन्नुभयो । अस्पतालले आफ्नै स्रोतमा प्रसुती तथा स्त्रीरोग विज्ञ चिकित्सक नियुक्त गर्न विज्ञापन गरेपनि कसैको दरखास्त नपरेको कारण प्रसुती विशेषज्ञ चिकित्सक अभाव भएको अस्पतालले जनाएको छ ।

मासिक ३० देखि ३५ जनाले प्रसुती हुँदै आएको अस्पतालमा चिकित्सक अभावमा सेवा बन्द भएपछि सेवाग्राहीहरू प्रसुतीको लागि राजधानी धाउन बाध्य भएका छन् । त्रिशूली अस्पतालमा नुवाकोटसहित धादिङको उत्तरी क्षेत्र र रसुवा जिल्लाका समेत सेवाग्राही सेवा लिन आउने गर्दछन् ।

नेपालको संविधान २०७२ को भाग ३ को धारा ३५ मा प्रत्येक नागरिकलाई स्वस्थ्य र स्वच्छ वातावरणमा बाँच्न पाउने हक र जनस्वास्थ्य सेवा ऐन २०७५ को परिच्छेद २ को दफा ३ मा स्वास्थ्य सेवाको पहुँच तथा सुनिश्चितता उल्लेख गरिएको छ । सोही दफाको उपदफा १ मा प्रत्येक नागरिकलाई गुणस्तरीय स्वास्थ्य सेवा सहज र सर्वसुलभ रूपमा प्राप्त गर्ने अधिकार किटान गरिएको छ । तर, त्रिशूली अस्पतालमा भने स्वास्थ्य सेवा नलिई बिरामी फर्कनु पर्ने अवस्था छ ।

नवदीप श्रेष्ठ