समाचारहरू

पहिरोले विद्यालयको भवन बगाएपछि मिक्वाखोला गाउँपालिका-३ स्थित पञ्चेश्वरी माध्यमिक विद्यालयका विद्यार्थी तीन वर्षदेखि टहरामै बसेर पढ्न बाध्य भएका छन् ।

०७२ जेठ २७ गते पहिरोले भवन बगाए यता उक्त विद्यालयका १ सय २५ भन्दा बढी विद्यार्थी टहरामै पढ्न बाध्य भएका हुन् । २०६८ को भुकम्पले चर्काएका असुरक्षित भवन समेत विद्यार्थीको नियमित पढ्ने कक्षा कोठा बनाइएको छ ।

'न झ्याल न ढोका न कोठालाई छेक्ने बार नै छ । वरीपरी बारिएका बाँसका भाटा मकाएर भ्वाङ पर्न थालेको छ । हिउँदमा हिमालको मुटु काप्ने सिरेटो र धुलो । वर्षामा आकाशे पानी । हिलो र लेदो सिधै कोठाभित्र पस्छ । त्यसमाथि गाइवस्तुको मलमुत्रको दुर्गन्घ । कक्षाकोठामा बस्ने फर्निचर पनि पर्याप्त छैनन् ।'-विद्यालयको दृष्य कहालीलाग्दो छ ।

बस्ने डेक्स बेञ्च नै नभएपछि विद्यालय जान मन लाग्न छाडेको कक्षा ५ मा अध्ययनरत ११ वर्षीया पासाङ शेर्पा बताउँछिन् । 'कक्षामा थोरै डेक्स बेञ्च छन् । त्यसमा पनि प्राय भाँच्चिएका छन् ।'-शेर्पा भन्छिन्-'त्यस्तैमा पालैपालो खाँदिएर बस्नुपर्छ ।'-कक्षा ४ का अमर लिम्बुले भने-'विद्यालयमा पढ्नभन्दा बढी सास्ती हुन्छ ।'

भौतिक पूर्वाधारकै अभावमा विद्यालयको नतिजा तीन वर्षयता खस्किँदै आएको छ । वडा अध्यक्ष दिपेन्द्र लिवाङका अनुसार विद्यायलको भवन निर्माणका लागि ५ लाख रुपियाँ विनियोजन गरिएको छ ।

ति बाहेक शिक्षा कार्यालयको सहयोगमा एउटा चार कोठे भवन निर्माणाधीन छ । पहिरोका कारण सामान ढुवानीमा समस्या हुँदा उक्त भवन समयमै निर्माण हुन सकेको छैन । पहिरो गएयता भवन निर्माण गरिदिन धेरै दाता गुहारेपनि कसैले चासो नदेखाएको निमित्त प्रअ बिकले बताए ।

जिल्ला शिक्षा अधिकारी चैतन्यप्रसाद निरौलाले सो विद्यालयको भवन निर्माणका लागि पहल भइरहेको बताए ।

देवराज गुरुङ