तीन वर्षदेखि छात्रवृत्तिबाट वञ्चित

  ०७३ चैत ६ गते

पञ्चदेवल विनायक नपा-४ कालिकास्थानमा अवस्थित ऋषिकुल माध्यामिक विद्यालयमा अध्ययनरत विद्यार्थीहरूले तीन वर्षदेखि छात्रवृत्ति रकम नपाएको पाइएको छ ।

विद्यार्थीहरूले लामो समयसम्म छात्रवृत्ति नपाएको भन्दै विद्यालय प्रशासनमा तालाबन्दीसहित विनायक बजारमा नाराबाजीसमेत गरेका छन् ।

विनायक बजारका रमेश रावतले विद्यार्थीहरूलाई छात्रवृत्ति नदिएको, विद्यालयमा कामसमेत गराएको लगायका आरोप लगाएका छन् ।

तर, विद्यालयका प्रधानाध्यापक गणेश शाहीले २०७२ सालसम्मको विद्यालयको सार्वजनिक सुनुवाइ भइसकेको बताउँदै ०७३ को रकम विद्यालयको खातामा रहेको र चाँडै छात्रवृत्ति वितरण गरिने बताए  ।

यस विषयका बारेमा जिल्ला शिक्षा अधिकारीलाई सम्पर्क गर्न खोज्दा सम्पर्क हुन सकेन । विद्यार्थीहरूले इलाका प्रशासन कार्यालय विनायकमा ज्ञापनपत्र बुझाएका छन् । उक्त विद्यालयमा हाल २ सय २० जना विद्यार्थीहरू अध्ययनरत छन् ।


शिवराज ढुङ्गाना