समाचारहरू

जिल्ला सदरमुकाम गमगढी जोडने सडकखण्डमा लगातारको वर्षाले विभिन्न स्थानमा गएको पहिरोको कारण यातायात अबरूद्ध भएपछि जिल्लामा खाद्यान्न अभाव भएको छ ।

जेठको अन्तिम हप्तादेखि लगातार परेको वर्षाले गमगढी नाग्मा सडक खण्डको विभिन्न भागमा गएको पहिरोले सडक अबरुद्ध भएपछि व्यापारीले स्टोर गरेको खाद्यान्न सकिएको र खाद्य संस्थानमा गएको आर्थिक वर्षचार स्थानीय तहलाई निर्धारण गरेको कोटा सकिएपछि खाद्यान्न अभाव भएको हो ।

व्यापारीले जसोतसो गरी खाद्यान्न बजारमा पुर्‍याउन थालेका भएपनि दुई हप्तादेखि चरम खाद्यान्न अभाव खेपिरहेका उपभोक्ताहरू व्यापारीले ल्याएको खाद्यान्न आफ्नो घर लैजान तानातान् गर्न थालेका छन् ।

जिल्ला खाद्य संस्थानमा जिल्लाका चार स्थानीय तहलाई खाद्य संस्थान केन्द्रिय कार्यालयले आर्थिक वर्ष ०७४/०७५ का १८ हजार क्वीन्टल खाद्यान्न निर्धारण गरेको भएपनि १५ हजार क्वीन्टल मात्र खाद्यान्न खाद्य संस्थानले आपूर्ति गरेको थियो ।

बाँकी ३ हजार क्वीन्टल खाद्यान्न आपूर्ति नगर्दा जिल्लामा खाद्यान्न अभाव भएका हो । बाँकी रहेको ३ हजार क्वीन्टल खाद्यान्न खाद्य संस्थान केन्द्रिय कार्यालयले आपूर्ति गरेको भए यस्तो समस्या नहुने खाद्य संस्थान मुगुका प्रमुख भरत खनियाले बताए ।

अहिले खाद्य संस्थानमा ३ सय २३ क्वीन्टल खाद्यान्न मात्र मौज्जाद छ । मौज्जाद रहेको खाद्यान्न प्रति ३० केजीको बोराको १ हजार ४ सय ४५ बाट १ हजार ९ सय रुपियाँ खाद्य संस्थान केन्द्रिय कार्यालयले निर्धारण गरेपछि सेवाग्राहीले महङ्गो भन्दै जापनिज चामल लिन मान्दैनन् । जिल्ला खाद्य व्यवस्थापन समितिले मूल्य घटाउन र आवश्यक खाद्यान्न आपूर्ति गर्न खाद्य संस्थान केन्द्रिय कार्यालयलाई जानकारी गराएको भएपनि खाद्यान्न आपूर्ति नहुँदा जिल्लामा खाद्यान्न अभाव भएको हो ।

वर्षातले सडक अबरूद्ध भएपछि खाद्यान्न र दैनिक उपभोग्य सामग्री बोकेर आएका गाडी बीच बाटोमै रोकिएपछि स्टोरमा राखिएका सबै खाद्यान्न सकिएको छ । भरिया र खच्चडमार्फत बोकाएर ल्याएको खाद्यान्न उपभोक्तालाई पुगेको छैन । दैनिक ५० क्विन्टल खाद्यान्न पसलबाट बिक्री हुने गरेको थियो । अहिले सडक अबरुद्ध हुँदा खच्चड र भरियाबाट ल्याएको १-२ सय बोरा खाद्यान्न उपभोक्ताले थाहा पाउन बित्तिकै आफ्नो घर लैजान तानतान् गर्छन् ।

खाद्य अभाव नहुँदा बजारमा उपभोक्ताले खोजे अनुसारको ३० केजी चामलको प्रति बोराको १ हजार ६ सय रुपियाँदेखि २ हजार रुपियाँमा किन्ने गरेका थिए । खाद्य अभाव भए यता बजारमा यो चामल १ हजार ८ सय रुपियाँदेखि २ हजार २ सय रुपियाँसम्ममा उपभोक्ताले तिर्ने गरेको र खाद्य संस्थानले पनि कमसल खालको चामल बजारको भन्दा चर्को मुल्यमा बिक्री गर्ने गरेकाले खाद्यान्न सहजै रूपमा नपाइएको गुनासो उपभोक्ताको छ ।

छायाँनाथ रारा नपा-१० का ६० वर्षीय कर्णसिंह बुढाले खाद्यान्न खोजीमा सदरमुकाम गमगढी आएको तीन दिनसम्म कतै खाद्यान्न किन्न नपाएपछि खाली हात घर फर्केको गुनासो गरे ।

जीवन सेजुवाल