समाचारहरू

युवा सङ्घका रुपन्देही जिल्ला अध्यक्ष दुर्गा तिवारीको हत्याको विरोधमा लुम्विनी बन्दका कारण पुस ५ गते यस क्षेत्रको जनजीवन प्रभावित भएको छ ।

इन्सेक रुपन्देही जिल्ला प्रतिनिधि रिमा विसीका अनुसार सङ्गठनकै कामको सिलसिलामा सिङ्गाहा जाँदै गरेका तिवारीसँगै खुशी न्यौपाने पनि तिवारीले चलाएको मोटरसाइकलमा पछाडि बसेका थिए । न्यौपानेका अनुसार तिवारीलाई गोली हानेपछि १० मिटर पर पुगेर तोरी बारीमा पल्टिएको थियो । भुँइमा लड्दा तिवारी बेहोस अवस्थामा थिए । सँगै बसेका न्यौपानेले हार गुहार गरेपछि यताउताबाट आएका मानिसहरूको सहयोगमा उनलाई अस्पताल लगिएको थियो ।

खैरेनी प्रहरी चौकीबाट ६ सय मिटरको दुरीमा दिन दहाडै गोली चल्दासमेत प्रहरी बेखबर भएकोमा स्थानीयहरूले चिन्ता व्यक्त गरे । हत्याराले यत्रो हत्या गरेर फोन गरी धम्क्याउँदा पनि प्रहरीले हत्यारालाई गिरफ्तार गर्न नसक्नुले सर्वसाधारणमा थप त्रास फैलिएको आन्दोलनकारीले बताएका छन् ।

बन्दका कारण पुस ५ गते पनि रुपन्देहीको जनजीवन प्रभावित भएको छ । बन्दका कारण यस क्षेत्रमा लामो तथा छोटो दुरीका सवारी साधनहरू चल्न सकेनन् भने उद्योगधन्दा कलकारखाना, शिक्षण संस्थाहरूसमेत पूर्ण रूपमा ठप्प रहे ।

गोली प्रहार गरेर छोराको हत्या भएको खबर सुनेपछि तिवारीकी ७९ वर्षीया आमा देउरुपा तिवारी अझै पनि अचेत अवस्थामा रहेकी छन् । मृतककी पत्नी रेनुका तिवारी पनि पतिको हत्याको खबरले अचेत अवस्थामा रहेकी छन् । मृतक तिवारीका दुई छोरीहरू ६ वर्षीया ऋतिका र ४ वर्षीया दिपीका बावुको मृत्युबारे बेखबर छन् ।

प्रहरीले अनुसन्धानका क्रममा एक मोटरसाइकल बरामद गरेको जनाएको छ । रुपन्देहीको मणिग्राम स्थित कान्छी बजारमा बेवारिसे अवस्थामा राखिएको १ सय ५० सिसीको रातो पल्सर मोटरसाइकल बरामद गरेको प्रहरीले जनाएको छ । जिल्ला प्रहरी कार्यालय रुपन्देहीका डिएसपी बेलबहादुर पाण्डेले बा ५१ प ८०७३ नं को पल्सर बाइक बरामद गरेको बताए ।

इन्सेक गुल्मी जिल्ला प्रतिनिधि टोपलाल अर्यालका अनुसार १९ दिनदेखिको जिल्ला बन्द फिर्ता भएकै दिन तिवारीको हत्या भएपछि पुनः आह्वान गरिएको बन्दले गुल्मीबासीको जनजीवन पुनः प्रभावित बनेको छ । बन्दका कारण गुल्मीमा यातायात, शैक्षिक संस्था र बजार पूर्ण रूपमा ठप्प भएका छन् ।

इन्सेक अर्घाखाँची जिल्ला प्रतिनिधि नारायण भुसालका अनुसार तिवारी हत्याको विरोधमा आह्वान गरिएको बन्दले अर्घाखाँचीको जनजीवन पनि प्रभावित बनेको छ । बन्दका कारण जिल्लाको यातायात, शैक्षिक क्षेत्र र बजार ठप्प रहेका छन् ।

जिल्ला बन्दका क्रममा मानवीय र भौतिक क्षति नभएको प्रहरीले बताएपनि बन्दकर्ताले बन्द अवज्ञा गरेको भन्दै पाँच ओटा मोटरसाइकल नियन्त्रणमा लिएर साँझ ५ बजेपछि सवारीधनीलाई फिर्ता गरेको जानकारी दिएका छन् ।

इन्सेक कपिलवस्तु जिल्ला प्रतिनिधि नन्दराम पौडेलका अनुसार अनिश्चितकालीन लुम्विनी बन्दका कारण कपिलवस्तुमा बिहानैदेखि यातायात उद्योगधन्दा, कलकारखाना बजार, शैक्षिक संस्था सबै बन्द हुँदा जनजीवन प्रभावित बनेको छ ।

पूर्व पश्चिम राजमार्गको चन्द्रौटा, इमिलिया, बुड्ढी, गोरुसिङ्गे, वनगाईलगायतका स्थानमा बन्दकर्ताले सडकमा नाराबाजी गर्दै टायर बालेर सडक अवरुद्ध पारेका थिए । बन्दका क्रममा कुनै किसिमको क्षती भने नभएको जिल्ला प्रहरी कार्यलय कपिलवस्तुले जनाएको छ ।

इन्सेक पाल्पा जिल्ला प्रतिनिधि यज्ञमूर्ति तिमल्सिनाका अनुसार तिवारी हत्याको छानबिन गरी दोषीलाई कारबाहीको माग गर्दै आह्वान गरिएको बन्दको प्रभाव पाल्पामा पनि पूर्ण रूपमा परेको छ । बन्दका कारण सार्वजनिक सवारीका साधन चलेनन् । विद्यालय तथा कलकारखाना समेत ठप्प भए ।

अनलाइन डेस्क