समाचारहरू

युवा सङ्घ रुपन्देहीका जिल्ला अध्यक्ष दुर्गा तिवारी र बसन्त पौडेलको हत्या घटनाका मुख्य आरोपित देवदह नपा-५ का २९ वर्षीय मनोज पुन फागुन ९ गते बिहान साढे तीन बजे प्रहरीको 'इन्काउन्टर'मा मारिएको प्रहरीले दावी गरेको छ ।

मनोजसँगै उनका साथी सोम आले पनि मारिएको प्रहरीले जनायो । प्रहरीका अनुसार सोम आले मनोज पुनका सहयोगी हुन् । मृतक पुन देवदह नपा-५ का बासिन्दा हुन् भने अन्दाजी ३६ वर्षका सोम आलेको स्थायी बसोबास नखुलेको र हाल भैरहवाको कारागार नजिकै बस्दै आएको प्रहरीले जनाएको छ ।

गत वर्षको फागुन ४ गते दुर्गा तिवारी हत्या काण्डपछि प्रहरीको मोष्ट वाण्टेड सूचीमा रहेका पुनलाई प्रहरीले विभिन्न माध्यमबाट खोजी गरिरहेको जनाइएको थियो । ०७४ पुस २१ गते देवदहकै बसन्त पौडेल बलुको हत्या भएपछि प्रहरीले पुनको खोजीमा अझ बढी सक्रियता रहेको जनाएको थियो ।

अनुसन्धानको क्रममा फागुन ८ गते मनोज पुन बुढा नेपाल आएर अर्को घटना घटाउँदै छन् भन्ने सूचनाका आधारमा नेपाल प्रहरी र केन्द्रीय अनुसन्धान व्यूरो (सीआबी) को संयुक्त टोलीले मनोजको खोजी गरिरहेको प्रहरीको भनाइ छ ।

जिल्ला प्रहरी कार्यालय रुपन्देहीका एसपी श्याम ज्ञवालीले फागुन ९ गते बिहान साढे ३ बजे देवदह नपा-४ भवानीपुरमा प्रहरीसँग मृतकद्वयको जम्काभेट भएको र गिरफ्तार गर्न खोज्दा गोली प्रहार गरेपछि प्रहरीले जवाफी कारवाहीमा मारिएको बताए ।

प्रहरीले मनोज पुनलाई १२ राउण्ड र सोम आलेलाई १० राउण्ड गोली प्रहार गरेको जनाएको छ । घटनास्थलबाट प्रहरीले एक थान डेल ल्यापटप, मेड इन इण्डिया लेखेको पेस्तोल, २ थान मोबाइल र एक थान डायरी बरामद गरेको एसपी ज्ञवालीले बताए ।

प्रहरीले गोली लागेर ढलेका पुन र आलेलाई बिहान साढे ४ बजे लुम्बिनी अञ्चल अस्पताल बुटवलमा ल्याए लगत्तै अस्पतालले उनीहरूलाई मृत घोषणा गरेको थियो । मृतकको शवलाई लुम्बिनी अञ्चल अस्पताल स्थित मुर्दाघरमा राखिएको छ ।

रीमा बि.सी.