समाचारहरू

तामाकोशी गाउँपालिकास्थित भिरकोट मतदान केन्द्रबाट मतदाता परिचयपत्र लिएर फरार भएका सोही पालिका वडा नं. १ का वडा अध्यक्ष महेश काफ्लेलाई प्रहरीले वैशाख २९ गते गिरफ्तार गरेको छ ।

तामाकोशी गाउँपालिका वडा नम्बर १ भिरकोटस्थित वडा कार्यालय भवनमा रहेको मतदान केन्द्रबाट वैशाख २८ गते दिउँसो १ सय २५ जनाको मतदाता परिचयपत्र लिएर फरार भएका काफ्लेलाई भिरकोट आसपासमै लुकिछिपि बसेको अवस्थामा प्रहरीले गिरफ्तार गरेको जिल्ला प्रहरी कार्यालयका डिएसपी गंगा पौडेलले जानकारी दिनु भयो ।

काफ्लेलाई थप अनुसन्धानका लागि जिल्ला प्रहरी कार्यालय ल्याइएको डिएसपी काफ्लेले बताउनु भयो ।

उनीमाथि निर्वाचन कसुर सम्बन्धी सजाय ऐन २०७३ अनुसार कारबाही चलाइने जिल्ला प्रहरी कार्यालयले जनाएको छ ।

निर्वाचनसँग सम्बन्धीत विषय भएकाले अन्य कुनै कारबाही प्रक्रिया अघि बढाउने अधिकार प्रहरीलाई नभएको डिएसपी पौडेलले बताउनुभयो ।

उनीमाथि कस्तो कारवार्ही हुन्छ भन्ने विषयमा अहिले मुख्य निर्वाचन अधिकृतको कार्यालयले निर्वाचन आयोगसँग परामर्श गरिरहेको प्रहरीले जनाएको छ ।

काफ्ले २०७४ सालको स्थानीय तह निर्वाचनमा नेपाली कांग्रेसबाट तामाकोशी गाउँपालिका वडा नं. १ को वडाध्यक्षमा निर्वाचित भएका थिए । उनी बाहालवाला जनप्रतिनिधि हुन् ।

यता नेपाली कांग्रेस दोलखाका सभापति बर्मा लामाले भने वडाध्यक्ष भएकाले आफूले वडाका सबैलाई चिन्ने भएकाले आफै वितरण गर्ने भन्दै उनले परिचयपत्र लिएको घटनालाई अतिरञ्जित बनाउन खोजिएको बताउनुभएको छ ।

वडा कार्यालयमा राखिएको सीसी क्यामेरा अफ गरेर उनले मतदाता परिचयपत्र लिएर फरार भएको स्थानीयको आरोप छ ।

उद्धव पोखरेल