समाचारहरू

सङ्खुवासभाको भोटखोला गाउँपालिका-२, च्याम्ताङका माओवादी केन्द्रका खुल्ला वडा सदस्य छिनाङ भोटेको हत्या भएको छ । असार ४ गते छिमेकी ५४ वर्षीय छिमिक भोटेसँग बाटोको विषयमा विवाद भएको र छिमिकले छिनाङको टाउकोमा ढुङ्गाले प्रहार गर्दा छिनाङ घाइते भएको जिल्ला प्रहरी कार्यालय सङ्खुवासभाले जनाएको छ ।

घाइते भएका छिनाङको स्थानीय चेपुवा स्वास्थ्य चौकीमा उपचार गरी घर लैजाने क्रममा राति अन्दाजी ९ बजे ज्यान गएको हो । ढुङ्गा प्रहार गर्ने छिमिक भोटेलाई प्रहरीले गिरफ्तार गरी कर्तव्य ज्यान मुद्दामा आवश्यक अनुसन्धान भइरहेको डिएसपी गौतमकुमार केसीले बताए । च्याम्ताङबाट जिल्ला अस्पाताल आउन करिव पैदल तीन दिन लाग्छ ।

नेकपा (माओवादी केन्द्र) सङ्खुवासभाले विज्ञप्तिमार्फत हत्यारालाई कारबाहीको माग गदै मृत भोटेलाई शहीद घोषणा गरी क्षतिपूर्ति उपलब्ध गराउन माग गरेको छ । जिल्ला इञ्चार्ज आरपी किराँतिद्वारा हस्ताक्षरित विज्ञप्तिमा घटनाले निर्वाचनको समयमा अशान्त वातावरण बनाएको भन्दै उम्मेदवारको सुरक्षाको साथै मतदाताहरूको समेत भरपर्दो सुरक्षा व्यवस्था गर्न माग गरेको छ ।

बावुराम बास्तोला