समाचारहरू

नियमित विद्यालय जानका लागि प्रोत्साहन गर्न दाङमा मुक्त कमैयाका बालबालिकालाई पुस २२ गते साइकल उपहार दिइएको छ ।

देउखुरीको गढवा, गङ्गापरस्पुर, गोवरडिहा, लालमटिया र सिसहनीयाका मुक्त कमैयाका २७ जना बालबालिकालाई साइकल वितरण गरिएको हो । घर नजिक विद्यालय नहुँदा हिँडेर जानुपर्ने र विद्यालय ढिलो जाने अवस्थाले विद्यार्थीहरूले विद्यालय नै छोड्ने अवस्था आएको भन्दै ती बालबालिकाहरूलाई साइकल वितरण गरिएको मुक्त कम्लरी विकास मञ्चकी पूर्व अध्यक्ष उर्मिला चौधरीले बताइन् ।

थारुहरूको महान पर्व माघि तथा नयाँ वर्षको अवसरमा एक समारोहकाबिच उनीहरूलाई साइकल वितरण गरिएको हो । यसअघि माघि पर्वकै अवसरमा थारु समुदायमा बालबालिकाहरूलाई कमैया कम्लहरीको रूपमा जमिन्दारको घरमा पठाउने चलन थियो ।

उक्त चलनको साङ्केतिक विरोधको रूपमा पनि मुक्त कमैयाका बालबालिकाहरूलाई विद्यालय जानका लागि प्रोत्साहन स्वरुप जनही ७ हजार ६ सय ५० रुपियाँको साइकल वितरण गरिएको हो ।

जेएन सागर