समाचारहरू

जिल्ला प्रहरी कार्यालय, डडेल्धुरामा कार्यरत प्रहरी सहायक हवल्दार थानेश्वरप्रकाश पन्तलाई कुटपिट गरेको आरोपमा प्रहरीले पाँच जना स्थानीयलाई ०८१ कात्तिक २० गते गिरफ्तार गरेको छ ।

अमरगढी नगरपालिका–५ बागबजारमा ड्युटीमा खटिएका प्रहरी हवल्दार पन्तलाई कात्तिक २० गते कुटपिट गरेको आरोपमा प्रहरीले भीमदत्त नगरपालिका–४, कञ्चनपुरका कार चालक २२ वर्षीय रोहित सार्की, अजयमेरु गाउँपालिका–४ का २८ वर्षीय बिनोद बैज, अजयमेरू गाउँपालिका–४ चिपुरका २६ वर्षीय पदम चटौत, २३ वर्षीय सुवास बोहरा र २७ वर्षीय जित ऐरलाई गिरफ्तार गरेको हो ।

धनगढीबाट डडेल्धुरा तर्फ आउँदै गरेको भारतीय नम्बर प्लेटको जीजि ५ आरभी ८८४८ नम्बरको महेन्द्रा कम्पनीको कारलाई बागबजारमा रोकी प्रहरी हवल्दार पन्तले चेकजाँच गर्दा प्रहरी हवल्दारलाई कुटपिट गरी ढुंगा प्रहार गरी घाइते बनाइएको जिल्ला प्रहरी कार्यालय, डडेल्धुराका इन्स्पेक्टर उपेन्द्र बमले बताउनु भयो ।

कुटपिटबाट घाइते पन्तको डडेल्धुरा अस्पतालमा उपचार सम्भव नभएपछि धनगढी रेफर गरिएको छ ।

घटनाका संलग्न पाँच जना आरोपितलाई गिरफ्तार गरी सार्वजनिक सुरक्षा हित, स्वास्थ्य र नैतिक बिरुद्धको अपराधमा सात दिनको म्याद थप गरेर अनुसन्धान भइरहेको इन्स्पेक्टर बमले बताउनु भयो ।

शेरबहादुर भण्डारी