समाचारहरू

गुल्मी अस्पताल, तम्घासबाट सुत्केरीहरूले पाउँदै आएको प्रोत्साहन भत्ता डेढ महिनादेखि बितरण हुन सकेको छैन । प्रोहत्साहन भत्ता वितरण नहुँदा सुत्केरी आमाहरू सुविधाबाट वञ्चित भएका छन् ।

नेपाल सरकारले गर्भवति आमा सरकारी स्वास्थ्य संस्थामा सुत्केरी हुन आउँदा प्रोत्साहन स्वरूप प्रत्येकलाई यातायात खर्च वापत २ हजार रूपियाँ र गर्भवती महिलाले सरकारी स्वास्थ्य संस्थामा नियमानुसार चेकजाँच गराए वापत ८ सय रूपियाँ पाउँछन् ।

उक्त दुबै सुविधा ०८० वैशाख २१ देखि गुल्मी अस्पतालले बन्द गरेको छ । अस्पतालले सुत्केरी आमाहरूलाई हातमै सुविधा प्रदान गर्न नर्सिंङ्ग शाखामा कार्यरत इन्चार्ज वा तोकिएको व्यक्तिलाई पेश्की उपलब्ध गराउँछ । पेश्की प्राप्त गर्नेले कार्यविवरणको आधारमा रकम फरच्यौट गर्दै जानुपर्छ ।

समयमै पेश्की फरर्च्यौट नगरेका कारण सेवा बन्द भएको गुल्मी अस्पतालका प्रमुख डाक्टर राजेन्द्रबहादुर जिसीले जानकारी दिनुभयो । जिसीले कानुन अनुसार एउटै व्यक्तिलाई पटक–पटक पेश्की दिन नमिल्ने र समयमै नर्सिंङ्ग शाखाले विवरण पेश नगरेका कारण समस्या परेको बताउनु भयो ।

नर्सिंङ्ग शाखा प्रमुख नर्सिंङ्ग अधिकृत संगीता रेश्मीले आफूले धेरै पटक पेश्की फररच्यौटको प्रयास गरेपनि कार्यालय प्रमुखले विभिन्न बखेडा झिकेर अल्झाइरहेको प्रतिक्रिया दिनुभयो । पेश्की फरर्च्यौटमा समस्या भएका कारणले सुत्केरीले पाउने सेवा प्रभावित भएको बताउदै  समाधानकोलागि कार्यालय प्रमुख सकारात्मक बन्नुपर्ने बताउनु भयो ।

अहिलेसम्म अस्पताल विकास समितिको रकमबाट पेश्की लिएर सुत्केरीलाई रकम प्रदान गर्ने गरिएको थियो । गुल्मी अस्पतालमा मासिक ५० देखि ७० जनाले प्रसुती सेवा लिने गरेका छन् । अस्पतालले सुत्केरी हुने बित्तिकै दिने सुविधालाई पछि दिने गरी पठाउदै आएको छ ।

टोपलाल अर्याल