समाचारहरू

जुम्लाका व्यापारीले पसलमा राखेका डिजिटल ढक तराजु प्रमाणीकरण नहुँदा ठगिनु परेको उपभोक्ताले गुनासो गरेका छन् ।

नापतौल विभागको प्रमाणीकरण पश्चात मात्र खरिद विक्री गर्न पाइने भएपनि बिना प्रमाणीकरण जुम्लाका अधिकांश खाद्य तथा किराना पसलहरूमा डिजिटल ढक तराजु चलाएको पाइएपछि आफूहरू ठगिएको उपभोक्ताले गुनासो गरेका हुन् ।

तातोपानी गाउँपालिका-४ का धनबहादुर बुढाले सरोकारवाला निकायले ध्यान नदिँदा उपभोक्ताहरू ठगिँदै आएको आरोप लगाए । उनले भने-'व्यापारीले सामान खरिद गर्दा विल नदिने गरेको र मूल्य सूची पनि टाँस गर्ने गरेका छैनन् ।'

उपभोक्ताबाट पटकपटक गुनासो आएपछि अनुगमनका क्रममा कतै ढुङ्गालाई ढक बनाएको भेटियो भने कतै ठुला पसलहरूमा राखिएका डिजिटल काटा प्रमाणीकरण नभएको भेटिएपछि उपभोक्ता दैनिक ठगिरहेको खाद्य अनुसन्धान अधिकृत अमितभुषण सुमनले बताए । उनका अनुसार डिजिटल काँटामा नापतौल विभागले टाँस्ने प्रमाणीकरणको स्टिकर नटाँसिएकाले विभिन्न पसलबाट काँटाहरू बरामत गरिएको छ ।

नापतौलमा भएको अनियमितताका कारण जुम्लाका उपभोक्ताहरू मारमा परेको नागरिक समाज जुम्लाका संयोजक राजबहादुर महतले बताए ।

बजार अनुगमनबाट २४ पसल मध्ये १२ ओटा पसलमा मिति गुज्रेको सामान भेटिएको सहायक प्रमुख जिल्ला अधिकारी टेकबहादुर बुढ्थापाले बताए । उनले भने-'पटकपटकको बजार अनुगमनबाट केही पसलमा साइनबोर्ड राखेको र प्यान नम्बर लिएको पाइएपछि व्यापारीहरू सजग बन्न थालेको पायौँ ।' अझै उपभोक्ताहरू प्रति व्यापारी उत्तरदायी हुनुपर्ने भन्दै स्वयम् उपभोक्ता पनि सामान खरिद गर्दा चनाखो हुनुपर्ने सहायक प्रजिअ बुढ्थापाले बताए ।

मानदत्त रावल