समाचारहरू

इटहरी उमनपा-१६ का ३४ वर्षीय मनोज पञ्जियारलाई इलाका प्रहरी कार्यालयका डिएसपीको नेमप्लेट लेखेको पैसा माग्न जाँदा सई रामचन्द्र पोखरेलले भदौ १० गते कुटपिट गरेको पीडितले आरोप लगाएका छन् ।

तीन दिन अगाडि सरुवा भएर आएका डिएसपी नरेशराज सुवेदीको नेमप्लेट लेखेको पैसा लिन जाँदा बिल बढी भएको भन्दै सईले कुटपिट गरेको रेन्बो आर्ट इटहरीमा काम गर्ने मनोजले बताए । मनोजले डिएसपीको कार्यकक्ष बाहिर भित्तामा झुन्ड्याउने र टेबलमा राख्ने नेमप्लेट लेखेको पैसा लिन प्रहरी कार्यालय पुगेका थिए ।

'छ सय रुपैयाँको बिल लिएर गएको थिएँ । पैसा बढी भो, यति थोरै लेखेको यत्रो बढी बिल भयो भनेर हप्काउँदै पिटनुभो ।'-मनोजले भने-'सुरुमा लेखा शाखाको सईले पिटनुभो । अनि पछि हेल्प डेक्सको एक जना प्रहरी पनि आएर थप पिटनुभो ।' कुटपिटबाट मनोजको देब्रे आँखा छेउको भाग सुनिएको छ ।

बढी पैसा बिलमा उल्लेख गरेपछि रेन्बो आर्टका सञ्चालक अर्जुन कटुवालसँग कुरा गर्छु भन्दा डिएसपी सुवेदीको बाहिर वालमा लेखिएको नेमप्लेट उठाएर लान खोजेको र आफूमाथि नै जाई लागेपछि प्रतिकार गरेको सई रामचन्द्रले बताए ।

डिएसपी नरेशराज सुवेदीले भने दोषी सई पोखरेलसहितलाई विभागीय कारबाही गर्ने बताए ।

शेखर ढकाल