डा. गोविन्द केसीद्वारा दसौँ पटकको अनशन सुरु

  ०७३ कात्तिक २९ गते

वरिष्ठतालाई मिचेर चिकित्साशास्त्र अध्ययन संस्थान (आइओएम)को डिनमा प्रा. डा. केशवप्रसाद सिंहलाई नियुक्त गरिएको भन्दै प्रा. डा. गोविन्द केसीले कात्तिक २८ गतेदेखि दसौँ अनशन सुरु गरेका छन् । यस अघि डा. केसी नाै पटक अनशन बसिसकेका छन् ।

कात्तिक २७ गते विज्ञप्ति जारी गर्दै कात्तिक २८ गते २ बजेसम्म डिन नियुक्त गर्नुपर्ने अल्टिमेटम दिएका डा. केसीले शिक्षण अस्पताल महाराजगञ्जमा पत्रकार सम्मेलन गरी कात्तिक २८ गतेबाटै अनशन सुरु गरेका हुन् ।

डा. केसीको माग अनुसार समयमा नै डिन नियुक्त गरिए पनि वरिष्ठताक्रम मिचिएको भन्दै उनले विरोध गरेका हुन् ।

डिन सर्च कमिटीले प्रा. डा. जगदीशप्रसाद अग्रवाल, प्रा. डा. सिंह र प्रा. डा. ज्योति शर्माको नाम डिनका लागि सिफारिस गरेको थियो ।

डा. केसीले चिकित्सा शिक्षा ऐन नआउँदै विस्तारित कार्यक्रम वा अन्य कुनै बहानामा नयाँ मेडिकल कलेजलाई सम्बन्धन दिन नहुने, संसद्बाट चिकित्सा शिक्षा ऐन पारित गर्दा सुझाएका संशोधन समेटेर तथा माथेमा प्रतिवेदन र विगतका सम्झौता अनुकूल हुनेगरी पारित गर्नुपर्ने लगायतका माग दोर्‍याएका छन् ।


अनलाइन डेस्क