समाचारहरू

दमौली अस्पतालमा सञ्चालित शत्रुघन–मञ्जु मृगौला डाइलासिस केन्द्रमा डायलासिस मेसिन बिग्रिएपछि बिरामीहरू समस्यमा परेका छन् ।

डाइलासिस केन्द्रमा रहेका ११ ओटा डायलासिस मेसिन मध्ये सात ओटा मेसिन बिग्रिएको छ । गत जेठ १७ गते राष्ट्रिय मृगौला उपचार केन्द्र काठमाडौंका प्राविधिक टोली आएर बिग्रिएका मेसिनको मर्मत सम्भार गरी सञ्चालनमा ल्याएपनि पुनः ति मेसिन बिग्रिदा समस्या भएको हो ।

डायलासिस सेवाका इन्चार्ज शैलेन्द्र पण्डितले ११ ओटामध्ये सात ओटा डायलासिस मेसिन बिग्रिएपछि अहिले चार ओटा मेसिनले मात्रै सेवा दिदै आएको बताउनु भयो । मेसिन बिग्रिएपछि डायलासिस गर्न आउने बिरामीलाई सहज रूपमा सेवा प्रदान गर्न नसकिएको पण्डितले बताउनु भयो ।

उक्त डायलासिस केन्द्रमा ४८ जना मृगौलाका बिरामीले नियमित रूपमा डायलासिस गराउँदै आएकोमा मेसिन बिग्रिएपछि सबैलाई पालो दिन डायलासिसको समय घटाइएको पण्डितले जानकारी दिनु भयो । बिग्रिएको मेसिन बनाउने प्राविधिक काठमाडौंबाट नै आउनु पर्ने भएको हुँदा तत्काल मर्मत गर्न नसकिएको उहाँले बताउनु भयो ।

दमौली अस्पताल व्यवस्थापन समितिका अध्यक्ष देवेन्द्र थापाले ११ मध्ये तीन ओटा मेसिन भने नबन्ने किसिमले बिग्रिएर थन्किएको अवस्थामा रहेको र बाँकीको मर्मत गर्न सके सेवा दिन सकिने बताउनु भयो ।

डायलासिस मेसिनका बारेमा गण्डकी प्रदेश सरकारलाई पटक–पटक जानकारी गराउँदा पनि सुनुवाई नभएको उहाँले बताउनु भयो ।

दमौली अस्पतालमा नियमित डायलासिस गराउँदै आउनुभएका व्यास–१ भादगाउँ चिनबहादुर थापाले मेसिन बिग्रिएपछि डायलासिसको समय अवधि पनि घटेको गुनासो गर्नु भयो । मेसिनको अभावमा हाल २५ जना डायलासिसका बिरामीले दिनभर पालो कर्दै बस्नु पर्ने थापाले बताउनु भयो ।

प्रकाशचन्द्र भट्टराई