समाचारहरू

सिमकोट गाउँपालिका–२ स्थित ठेहे गाउँमा विधुतको ट्रान्समिटर नहुँदा एक वर्षदेखि बत्ति बाल्न नपाएको स्थानियले गुनासो गरेका छन् । वडाका स्थानीय बासिन्दाले पैरापोरी जल विद्युत उपभोक्ता समितिको वितरण लाइन तानेको एक वर्ष विति सक्दा पनि ट्रान्समिटर नहुँदा नागरिकले बत्ति बाल्नदेखि विभिन्न समस्या भोग्दै आएका छन् ।

गाउँमा एक बर्ष अगाडिनै सबै ठाउँको वितरण लाइन तानेर घरहरू वाईरिङ गरी सकेको भएपनि सहायक लाईन वितरणका लागि आवश्यक पर्ने ट्रान्समिटर नभएकै कारण बत्ति बाल्न नपाएपछि अन्धकारमा बस्न बाध्य भएको स्थानीय हर्कधन सुनारले गुनासो गर्नुभयो ।

उहाँका अनुसार ट्रान्समिटर जडान नभएकै कारण सोही गाउँपालिका–१ स्थित कुम्लीक सामुदायीक स्वास्थ्य इकाईमा आउने सेवाग्राही मर्कामा पर्दै आएका छन् ।सुत्केरी गराउनका लागि मङ्सिर २० गते सो स्वास्थ्य संस्थामा आए पनि विधुत अभावका कारण सुत्केरी गराउन समस्या भएको सोही स्वास्थ्य संस्थाका इन्चार्ज धन्जित भणरीले बताउनुभयो । इन्चार्ज भण्डारीका अनुसार विधुत आपुर्ति हुन नसकेपछि दैनिक दिन आउने सेवाग्राहीलाई उपचारमा समस्या हुने गरेको छ ।

त्यसै गरी स्वास्थ्य संस्थामा सुत्केरी गराए पश्चात बच्चालाई तताउने वेवी वार्मर समेत विधुत विहीन बनेको इन्चार्ज भण्डारीको भनाइ छ । गाउँका २० घरधुरी ट्रान्समिटर नभएकै कारण अन्धकारमा बस्न बाध्य भएका छन । गाउँमा उज्यालोका लागि बत्ति निर्माण गरिएको भएपनि एक वर्ष वित्दा पनि बत्ति बाल्न नपाउनु दुखको कुरा भएको अर्का स्थानीय मकविर सुनारले गुनासो गर्नुभयो ।

आफूले पटक पटक नेपाल विद्युत प्राधिकरणको हिल्दुम विद्युत वितरण केन्द्रमा गएर माग गरेपनि सो कार्यालयले कुनै सुनुवाइ नगरेको गुनासो गर्नुभयो । ट्रान्समिटर नहुँदा बालबालिकाहरूको पठनपाठनलाई प्रभावित बनाएको, सुत्केरीलाई समेत समस्या भएको सुनारको भनाइ छ ।

सो विषयमा हिल्दुम विधुत प्राधिकरण कार्यालयमा बुझ्दा ट्रान्समिटर खरिदका लागि ठेकेदार अर्विन लामालाई जिम्मा दिएको सोही कार्यालयका निमित्त कार्यालय प्रमुख मिमबहादुर कार्कीले बताउनुभयो । उहाँका अनुसार ठेकेदारले सो सामगी्र सिमकोट ल्याइसकेको र अबको केही दिनमा गाउँमा लगेर जडान गर्ने बताउनुभयो ।

नन्द सिंह