समाचारहरू

अविरल वर्षाका कारण ट्रष्ट पुल बगाउँदा बालबालिका विद्यालय जानबाट वञ्चित भएका छन् । शिवालय गाँउपालिका–६ स्थित टुनीबगरमा आएको बाढीले ट्रष्ट बगाउँदा खोला तर्ने बैकल्पिक व्यवस्था नहुँदा एक हप्तादेखि विद्यालय बन्द भएको हो ।

भदौ २ गते आएको बाढीले पुल नै बगाइदिएपछि बालबालिका आवतजावत गर्ने बैकल्पिक व्यवस्था नहुँदा खडगदेवी माध्यामिक विद्यालय टुनीवगरका विद्यार्थी प्रभावित भएका छन् । विद्यालय पुग्न बैकल्पिक बाटो नहुँदा सञ्चालनमा आउन सकेको छैन । बाढीले पुल बगाउँदा बैकल्पिक बाटो नहुँदा सो विद्यालयमा अध्ययनरत करिव ३ सय ५० विद्यार्थीको पढाइ प्रभावित भएको छ । बाढीले पुल बगाएपछि शिलाय गाउँपालिका–६ रोकायजाँत, रिसिना, टुनीवगर, बुर्दा गाउँ बस्तीका बालबालिका विद्यालयको पठनपाठनबाट वञ्चित भएका छन् ।

बाढीले पुल बगाएपछि एक हप्ता अघि बन्द भएको विद्यालय सञ्चालनमा आउन नसकेपछि सूचना प्रकाशित गरी बन्द गरिएको थियो । शिबालय गाउँपालिका–६ का जनक बुढाले एक हप्ता अघि बाढीले पुल बगाएर विद्यार्थीलाई समस्या भए पनि सरोकारवाला निकायले ध्यान नदिँदा लामो समय विद्यालय बन्द गर्दा बालबालिका शिक्षा पाउनबाट वञ्चित भएको बताउनु भयो । गुणस्तरीय शिक्षा भन्दै गर्दा बाढी पहिरोले बाटो अवरुद्ध गरेपछि खुलाउने प्रयास नहुँदा बालबालिका घरमै बस्न बाध्य भएका हुन् ।

शिबालय गाउँपालिकाका अध्यक्ष शेरबहादुर शाहीका अनुसार अविरल वर्षासँगै आएको बाढीले टुनीवगरको ट्रष्ट तथा नागरिकको घर र खेतीयोग्य जमिनमा नोक्सान गरेको जानकारी पाएपछि स्थलगत अध्ययन गरी फर्किएको बताउनु भयो । बाटो बन्द भइ विद्यार्थीहरू विद्यालय जानबाट वञ्चित भएकाले केही दिनमा खोलामा जाली लगाएर अस्थायी रूपमा काठे पुलको व्यवस्था गरिने अध्यक्ष शाहीले जानकारी दिनुभयो । अनुगमन गरी फर्केपछि इन्जिनियर मनोज केसीलाई बाढी प्रभावित क्षेत्रमा लाग्ने खर्च र तत्काल समाधान गर्ने विधिका बारेका प्रक्रिया अघि बढेको उहाँले बताउनु भयो । बाढीले पुल बगाएर विद्यार्थी शिक्षाबाट वञ्चित भएकाले उहाँले दुख व्यक्त गर्नुभयो । केही दिनमै अस्थायी काठेपुल निर्माण गरी विद्यालय सञ्चालनमा ल्याउने अध्यक्ष शाहीको भनाइ छ ।

बाढीपहिरोले सडक अवरुद्ध गरेपछि गाउँबस्तीमा सहज रूपम पुग्ने अवस्था छैन । पानी नपरेको दिन खोलामा काठ प्रयोग गरी विद्यालय आवतजात गर्न सकिने भए पनि बर्खाको समयमा पानी परेपछि विद्यार्थीको बिचल्ली हुने भएकाले विद्यालय बन्द गर्नु परेको प्रधानाध्यापक बीरबहादुर शाहीले बताउनु भयो । गाउँपालिकाका इन्जिनियर मनोज केसीका अनुसार काठको पुल बनाएर विद्यार्थी, सर्वसाधारणलाई आवतजावत गर्न स्थानीयलाई काठको व्यवस्थापन गर्न लगाएको बताउनु भयो । एक दुई दिनमा जाली लगाएर तत्काल अस्थायी रूपमा काठको पुल निर्माण गरी आवतजावतमा सहजता ल्याउने केसीले बताउनु भयो ।

बासुदेव शर्मा