समाचारहरू

शुक्लाफाँटा नगरपालिका–६ सिमलफाँटाका ६२ वर्षीया सीतादेवी नेगीले तीन वर्षअघि आजकै दिन कैलालीको टीकापुर घटनामा छोरो गुमाइन् । नेपाल प्रहरीमा जागिरे छोरो गुमाए यता नेगी परिवारको विचल्ली भएको छ ।

बुढेसकालको भरोसा मानेको जेठो छोरो जनकबहादुरलाई गुमाएयता सीतादेवीको आँशु रोकिएको छैन । उनको घरमा पुग्दा बृद्धा नेगी घाँस काट्दै थिइन् । “छोरो गुमाएयता बिरामी नै परेँ । हरेक दिन खाना पस्केर खान बस्दा छोरालाई नै सम्झिन्छु ।” सीतादेवीले आँशु झार्दै भनिन् ।

छोरा मारिएको तीन वर्ष बितिसक्दा पनि घटनाका दोषीलाई कारबाही हुन नसकेको भन्दै उनले दुःख मनाउ गरेकी छन् ।

टिकापुर घटनापछि प्रहरी हवल्दार जनकबहादुरकी पत्नी परमादेवी पाँच सन्तानका साथ माइतीघरमा बस्दै आएकी छन् । दाजु मारिएपछि सीतादेवीको कान्छो छोरो उमेश वैदेशिक रोजगारबाट फर्किएर अहिले घरमा बेरोजगार बनेका छन् । “परिवारको भरोसा नै जेठो छोरा जनक थियो ।”-सीतादेवीले भनिन् ।

कान्छो छोराको सहारामा बाँचेको नेगी परिवारको आर्थिक अवस्था कमजोर बन्दै गएको छ । “बुढेसकालमा भरोसा गुमाउँदा परिवारमै विचलन आयो ।”-जनकका बुवा वीरसिंहले भने- “कहीँकतैबाटै सहयोग पाउन सकिएन । दोषीलाई कारबाही भएको देख्न पाए हुन्थ्यो ।” टीकापुर घटनामा संलग्न २२ जनालाई समातेको सुन्नमा आएपनि सजाय के भयो थाहा नपाएको उनी बताउँछन् ।

घटनापछि बुहारी परमादेवी भीमदत्तनगरपालिका–१९ बागफाँटामा माइतीघरमा बस्दै आएकी छन् । “छोरो गुमाएपछि सरकारले उपलब्ध गराएको रकमबाट नाति/नातिनीको खर्च चलाएको छ ।”-वीरसिंहले भने । नेगी परिवार राहत र न्यायको पर्खाइमा छ । आफूसित भएको चार कट्ठा जमीनमा खेती फलाएर परिवारको छाक टार्न मुस्किल भएको उनी बताउँछन् ।

यस्तै टीकापुर घटनामै ज्यान गुमाएका प्रहरी निरीक्षक बलराम विष्टको परिवारको पनि आँशु अझै थामिएको छैन । शुक्लाफाँटा नगरपालिका–११ कलुवार घर भएका विष्टकी पत्नी मन्धरादेवी घटनापछि अहिलेसम्म घर बाहिर निस्केकी छैनन् । पतिवियोगको पीडा झेल्दै आएकी उनले पीडकलाई कारबाही गर्न भएको ढिलाइप्रति दुखेसो पोखिन् ।

“घटना भएको तीन वर्ष भयो । म घर बाहिर निस्कन सकिरहेको छैन ।”-उनले भनिन्-“श्रीमान्ले त्यत्तिक्कै ज्यान गुमाउनुभयो । चित्त बुझाउने ठाउँ छैन ।” घटना हुँदा पीडित परिवारका छोरा/छोरीलाई सरकारले निःशुल्क शिक्षा दिने भने पनि हालसम्म केही सुनुवाइ नभएको मन्धरादेवीको गुनासो छ । उनका छोरा/छोरी बुवाले पाउने सुविधाबाटै अध्ययन खर्च गर्दैछन् ।”

त्यसैगरी टीकापुर घटनामै ज्यान गुमाएका बेलौरी नगरपालिका–६ विद्यानगरका इन्स्पेक्टर केशव बोहराको परिवार पनि हत्यामा संलग्नलाई कारबाही नभएकोप्रति निराश छ । बोहराकी पत्नी र छोरा/छोरी काठमाडौँमा बस्दै आएका छन् । घरमा भेटिएका बोहराका भाइ महेश दोषीलाई कारबाही भएमात्रै पनि मृत आत्माले शान्ति पाउने बताउँछन् ।

“यति ठूलो घटनाका दोषीलाई कारबाही गर्न सरकार गम्भीर भएको देखिएन ।”-उनले भने- “पीडकलाई राजनीतिक कारण देखाएर उन्मुक्ति दिन हुँदैन ।”

“कारबाही हुनुपर्ने मान्छेलाई संरक्षण दिनु हुँदैन ।”-उनले भने । ०७२ भदौ ७ गते भएको टीकापुर घटनामा एसएसपी लक्ष्मण न्यौपाने, इन्स्पेक्टरद्वय बलराम विष्ट र केशव बोहरासहित आठ प्रहरी र एक बालकले ज्यान गुमाएका थिए ।

उक्त घटनाको मुद्दा हाल कैलाली जिल्ला अदालतमा चलिरहेको छ । घटनाका आरोपितमध्ये २३ जना कैलाली कारागार र मुख्य आरोपित रेशमलाल चौधरी केन्द्रीय कारागार काठमाडौँमै पुर्पक्षका लागि थुनामा छन् । आरोपित आश्रित दुई बालबालिका पोखराको बाल सुधारगृहमा छन् । समाचार साभारः शेरबहादुर सिंह/रासस

अनलाइन डेस्क