समाचारहरू

तीन वर्षदेखि टिकापुर घटनाका आरोपितविरूद्ध चलाइएको मुद्दाको साउन २४ गते तोकिएको पहिलो पेशी सारिएको छ ।

पेशी सारेपछि टिकापुका स्थानीयहरूले असन्तुष्टी जनाएका छन् । टिकापुर नपा–९ का स्थानीय टिकाराम चौधरीले तीन वर्ष पुरा हुनै लाग्दासम्म पनि सुनुवाइ नहुनु बिडम्वना भएको बताए । उनले दोषीलाई कारवाही र निदोर्ष व्यक्तिलाई स–सम्मान न्याय दिनु पर्नेमा अदालतले आफैले तोकेको पेशी पनि सार्नु भनेको कुनै षड्यन्त्र भैइरहेको समेत आरोप लगाए ।

न्यायधीश पर्शुराम भट्टराई काठमाडौँमा स्वास्थ्य उपचार गरी साउन २४ गते मात्रै फर्केकाले टिकापुर घटना मुद्दाको पेशी हुन नसकेको कैलाली जिल्ला अदालतका नायब सुब्वा भानुभक्त पाण्डेले बताए । उनले साउन २४ गते हुने भनिएको पेशी साप्ताहिक मुद्दा पेशीमा नचढाइएकोले उक्त मुद्दाको अर्को पेशी साउन ३० गते तोकेको बताए ।

प्रतिवादीतर्फबाट मुद्दाको वकालत गरिरहेका अधिवक्ता गजेन्द्र केसीले साउन ३० गते हुने पेशीमा अदालतले साक्षी आदेश जारी गर्ने बताए । उनले टिकापुर घटनाको मुद्दा नियमित पेशीमा चढे चाँडै नै किनारा लाग्ने बताए ।

थरूहट आन्दोलनको क्रममा ०७२ भदौ ७ गते आन्दोलनकारी र प्रहरीबिचको दोहोरो झडपमा परी एक नाबालकसहित सात प्रहरीको ज्यान गएको थियो । उक्त घटनामा संलगन रहेको आरोपमा एक नाबालक, राष्ट्रिय जनता पार्टीकातर्फबाट प्रतिनिधि सभाका सदस्यमा विजयी भएका रेशम चौधरीसहित २६ जनालाई विभिन्न मुद्दा चलाई पुर्पक्षको लागि कारागार चलान गरिइएको  छ । उनीहरूविरूद्ध कर्तव्य ज्यान, ज्यान मार्ने उद्योग र डाँका चोरी मुद्दा चलाएको जिल्ला अदालत कैलालीले जनाएको छ ।

रविना चौधरी