समाचारहरू

जिल्ला अदालत कैलालीले टीकापुर घटनाको मुद्दाको पहिलो पेशीमा वादी र प्रतिवादी दुवै पक्षका साक्षी अदालतमा पेश गर्न साउन ३० गते आदेश जारी गरेको छ ।

घटनाको तीन वर्षपछि साउन ३० गते भएको पहिलो पेशीमा न्यायाधीश परशुराम भट्टराईको इजलासले दुवै पक्षको साक्षी अदालतमा पेश गर्न आदेश जारी गरेको हो ।

अदालतले वादी पक्षको साक्षी जिल्ला वकिलको कार्यालयमार्फत र प्रतिवादी पक्षको साक्षी निजहरूमार्फत अदालतमा उपस्थित गराउने आदेश जारी गरेको कैलाली जिल्ला अदालतका श्रेस्तेदार इन्द्रबहादुर कठायतले बताए ।

उनले यो आदेशपछि अर्को पेशी तोक्ने र त्यसमा दुवै पक्षको साक्षी उपस्थित गराई फेरि अर्को पेशी तोक्ने जानकारी दिए ।

थरूहट आन्दोलनको क्रममा ०७२ भदौ ७ गते आन्दोलनकारी र प्रहरीबिचको दोहोरो झडपमा परी एक नाबालकसहित सात प्रहरीको ज्यान गएको थियो ।

उक्त घटनामा संलगन रहेको आरोपमा एक नाबालक, राष्ट्रिय जनता पार्टीका तर्फबाट प्रतिनिधि सभाका सदस्यमा निर्वाचित रेशम चौधरीसहित २६ जनालाई विभिन्न मुद्दा चलाएर पुर्पक्षको लागि कारागार चलान गरिएको छ ।

टिकापुर घटनाका ३२ जना आरोपित फरार रहेको प्रहरीले जनाउँदै आएको छ । उनीहरू विरूद्ध कर्तव्य ज्यान, ज्यान मार्ने उद्योग र डाँका चोरी मुद्दा चलाएको जिल्ला अदालत कैलालीले जनाएको छ ।

रविना चौधरी