समाचारहरू

अदालतसामु फागुन १४ गते आत्मसमर्पण गरेका टिकापुर घटनाका मुख्य आरोपित रेशम चौधरी फागुन १४ गते नै पुर्पक्षका लागि जेल चलान भएका छन् । न्यायाधीश परशुराम भट्टराईको इजलासले उनलाई धनगढीस्थित कारागारमा राख्न आदेश दिएको हो ।

राष्ट्रिय जनता पार्टीको तर्फबाट कैलाली क्षेत्र नम्बर १ बाट प्रतिनिधि सभा सदस्यमा निर्वाचित रेशम  चौधरी ०७४ फागुन १४ गते कैलाली जिल्ला अदालत, धनगढीमा आफैँ उपस्थित भएका थिए ।

०७२ भदौ ७ गते थरूहट आन्दोलनका क्रममा नेपाल प्रहरीका वरिष्ठ प्रहरी उपरीक्षक लक्ष्मण न्यौपानेसहित सात सुरक्षाकर्मी र एक बालकको टिकापुरमा ज्यान गएको थियो । सो घटनाका मुख्य आरोपित चौधरी सोही समयदेखि फरार रहेका थिए ।

चौधरी कैलाली क्षेत्र नम्बर १ बाट प्रतिनिधि सभाका लागि विजयी भएपछि पत्नी रञ्जिता श्रेष्ठ चौधरीलाई वारेस दिँदै प्रमाणपत्र लिन पठाएको भए पनि विजयी प्रतिनिधि स्वयम् उपस्थित हुनु पर्ने भन्दै जिल्ला निर्वाचन कार्यालयले प्रमाणपत्र दिन अस्वीकार गरेको थियो ।

घटनाको अभियुक्त ठहर गरिएको भन्दै उनलाई निर्वाचन आयोगले विजय भएको प्रमाणपत्र समेत दिएको छैन ।

चौधरीले वारेसबाट प्रतिनिधि सभा सदस्य प्रमाणपत्र पाउँ भन्दै सर्वोच्च अदालतमा मुद्दा दर्ता गराउने प्रयास गरेकामा अदालतका मुख्य रजिष्ट्रार नहकुल सुवेदीले दरपीठ गरेका थिए । अदालतले अर्को पेशी फागुन १६ गतेका लागि तोकेको छ ।

इन्सेक कार्यालय, धनगढी