समाचारहरू

कानुन न्याय तथा संसदीय मामिला मन्त्री पदम गिरीले सत्य निरूपण तथा मेलमिलाप आयोग र बेपत्ता नागरिक छानबिन आयोगसम्बन्धी (टिआरसी) विधेयक अन्तिम चरणमा पुगेको बताउनुभएको छ ।

जनसंवाद कार्यक्रमका शिलशिलामा पर्वत आउनुभएको मन्त्री गिरीले चैत १४ गते पर्वतको कुश्मा बजारमा आयोजित कार्यक्रममा टिआरसी विधेयक अन्तिम चरणमा रहेको बताउनुभएको हो ।

उहाँले केही राजनीतिक दलहरुको बुँदागत रुपमा थोरै असहमति रहेको बताउँदै छलफल र संवादको माध्यमबाट अन्तिम चरणमा पुगेको बताउनुभयो । मन्त्री गिरीले भन्नुभयो, ‘विधेयकमा विभिन्न राजनीतिक दलका नेताहरुको बिचमा धेरै चरणमा छलफल भएको छ, संसदका समितिहरुमा पनि चरणवद्ध छलफल भएको छ, अधिकांश बुँदामा सहमति भए पनि केही बुँदामा अझै छलफल गरेर टुङ्गाेमा पुग्छौँ ।’

खासगरी पीडितलाई न्याय दिलाउने गरी विधेयक ल्याउनुपर्नेमा दलहरू सहमत भएको उहाँले बताउनुभयो । विधेयक पास भैसकेपछि कतैबाट विरोधका स्वरहरू ननिस्किउन् भन्नेतर्फ सचेत हुँदै पूर्ण तयारी र सहमतिका साथ पारित गरिने मन्त्री गिरीले बताउनुभयो ।

सन्तोष थापा