समाचारहरू

झुम्का कारागारमा कैदीबन्दीबिच ०७८ चैत ३० गते झडप भएको कारागार प्रशासनले जनाएको छ ।

कारागार प्रशासनका अनुसारमा झडपमा २५ जना कैदी घाइते भएका छन् ।

कारागारको बी ब्लकमा रहेका कैदीबन्दीको समूहबिच झडप भएको कारागारका जेलर प्रदीप शाहले बताउनु भयो ।

झडपमा परी २५ जना कैदी घाइते भएका छन् । जसमध्ये पाँच जनालाई गम्भीर चोट लागेकाले उपचारका लागि जिल्ला अस्पतालमा भर्ना गरिएको छ ।

कारागारको चौकीदार को बन्ने ? भन्ने विषयमा विवाद हुँदा दुई समूहबिच झडप भएको जेलर प्रदीप शाहको भनाइ छ ।

झडपमा परी घाइते भएकामध्ये २० जनाको कारागारमै स्वास्थ्यकर्मी झिकाएर उपचार गरिएको जेलर शाहले बताउनु भयो ।

झुम्का कारागारको बी ब्लकका चौकीदारसमेत रहेका कैदी खड्गबहादुर राई र ए ब्लकका जोन नाल्बो लिम्बूलाई मुढा बनाउने कच्चा पदार्थ खरिद गर्न बजार निस्किएको बेला जिल्ला प्रहरी कार्यालय सुनसरीको टोलीले ०७८ चैत २ गते गिरफ्तार गरी अन्यत्र सरुवा गरेपछि कारागार अशान्त भएको कारागार प्रशासनको भनाइ छ ।

राईलाई डिल्लीबजार कारागार र लिम्बूलाई भिमफेदी कारागार पठाइएको जिल्ला प्रहरी कार्यालय सुनसरीका एसपी सञ्जयसिंह थापाले बताउनु भयो ।

सरुवा भएर अन्यत्र सारिएका दुई चौकीदारको ठाउँमा नयाँ चौकीदार कसलाई बनाउने भन्नेमा विवाद हुँदा झडप भएको र हाल अवस्था सामान्य भएको जेलर प्रदीप शाहले बताउनु भएको छ ।

झडपमा परी घाइते भएकाहरूको विवरण अनुसन्धानका लागि गोप्य राखिएको कारागार प्रशासनले जनाएको छ ।

जयकृष्ण यादव